الحلقة الثالثةمن كرسى الاعتراف

لم نفسك ياجمال والله العظيم هضربك انت حر

ليه يا جماعه كده الزمالك والاهلى اخوات برده بهدى النفوس
ميتشو
ايه اللى حببك فى الزمالك يعنى اكيد انت لقيت حد من عائلتك بيشجع الزمالك فشجعته ؟
ناوى تشتغل فى مجال الطب البيطرى بعد ما تتخرج ولا فى مجال تانى؟
لو انت حبيت بنت هتتجوزها ولا تفكيرك البنت اللى اعرفها قبل الجواز غير اللى اتجوزها؟
واخيرا
حلم حياتك اللى نفسك تحققه ؟
ومين اكتر شخصيه ليها تاثير فى حياتك

اسفه لانى طولت عليك

شوفى ياستى اولا بالنسبة للزمالك والله تقدرى تقولى انا اتولدت كدة يعنى بالفطرة صحيح انا عيلتى كلها او معظمها بيشجعوا الزمالك وماانكرش ان دة كان لية تاثير ثانيا بالنسبة للشغل انا بحب مجال الادوية مش شرط اكون فى شركة ممكن اشتغل حر وبردو فى مجال مراقبة الاغذية والمطارات والحوارات دى جايز اشتغل فيها لانى عقبال عندك عندى واسطة ممكن تشغلنى ثالثا لو حبيت بنت يبقى لازم هتجوزها مفيش حاجة اسمها احب البنت بس ساعة الجواز انفضلها الكلام دة ماينفعش رابعا حلمى اللى عاوز احققة هو انى اسيب بصمة فى حياتى مش اعيش واموت زى معظم الناس ومفيش حد يعرف عنهم حاجة اعظم حاجة ممكن الانسان يعملها انة ياثر فى حياة اللى حوالية خامسا اكتر الشخصيات المؤثرة فى حياتى هى شخصية مثالية راسمها فى خيالى وبحاول اعمل زيها دايما لانى للاسف مش لاقيها فى الواقع

ايه ده انا لسه ملحقتش اسأل الاء ياناس كل ده عشان النت فصل عندى

اما الاخ ميتشو

فجااااااااااااااااااااااااارى التفتيش عن الاسئله يارب متقفلو بدرى

براحة عليا والنبى يا اهلاوية احنا مشرفين زى بعض وناس كرويين وملناش غير بعض ماتشمتيش فينا الناس

ياميتشو الناس هنا بتحبك موت كله بيفكرلك ف اسئله
للعلم مدة العضو على كرسى الاعتراف هى اسبوع فقط

اة بيفكرولى فى اسئلة ربنا يستر بس هيا فين اسئلتك انت يا جيمى

انتا مستعجل ليه يلا ع البركه
اول سؤال ياميتشو لو قالولك الزمالك اتلغى م الانديه المصريه هتعمل ايه ؟ واذا حصل ده فعلا ممكن تشجع الاهلى ولا؟
الثانى فى مباراة الاهلى اللى فاتت كنت عايز مين يفوز؟ وف المباراه الجايه هتشجع مين؟
ثالثا ايه اكتر حاجه عجباك ف المنتدى؟ وايه اكتر حاجه بتكرها؟
رابعا عرفنا ببلدك وبالمدارس اللى انتا اتعلمت فيها؟
اخيرا مين اعز صديق ليك ؟ ومين اكتر واحد ممكن تسمحله انه يدخل ف حياتك الخاصه؟
انت اللى طلبت ياحوده

انا مش عارف اية اللى خلانى انسحبت من لسانى وطلبت منك تسال ربنا يسامحنى بص ياسيدى اولا انا زملكاوى للابد ومش هشجع غير الزمالك حتى لو اتلغى ودة استحالة انة يحصل ان شاء اللة ثانيا الماتش اللى فات حصللى حاجة غريبة جدا فى الاول بصراحة كنت مش عايز الاهلى يكسب بس فى نفس الوقت مايتغلبش بس لما دخل فية الجونين بجد كنت عاوزة يعوض لانة بيلعب باسم مصر بس الماتش اللى جاى لا هشجعة لان الفرقة اللى قدامة من شمال افريقيا واحنا عارفين قد اية بيكرهونا ثالثا اكتر حاجة عجبانى فى المنتدى بجد ان احنا كلنا بنكلم بصراحة وفى احترام متبادل بينا وكانة team work فعلا اما اللى بكرهة بجد لغاية دلوقتى مفيش بدليل انى قاعد تقريبا علية معظم الوقت بس اللى انا بتمناة ان المنتدى بتاعنا يوصل لكل طلبة بيطرى ودة دورنا ياجماعة على فكرة رابعا بالنسبة ياجمال للمدارس واللة تقريبا نسيتها هههههههههه مش فاكرها صراحة تقريبا كانت ىمدرسة خالد ابن الوليد خامسا بالنسبة للصديق يعنى ممكن تقول من جوة الكلية فى مصطفى بسيونى ومحمد عبدالرحمن ومحمود زكريا ووجية (رجالة سكشن ه)وطبعا انت ياجيمى وايمن وكتير واللة بجد من برة الكلية يعتبر احمد عبدالمنعم الاقرب ليا بالنسبة للحياة الشخصية اعتقد مصطفى بسيونى وعبدالرحمن هما اكتر اتنين ممكن اسمحلهم يدخلوا بس بحدود طبعا

يانهار ابيض اية دة كلة ماشى بالنسبة للكورة ايوة بلعب كويس الحمد للة وعلى فكرة انا كنت فى سنة اولى فى جامعة تانية غير الزقازيق وكنت فى فريق الكلية والوحيد اللى رحت من سنة اولى تبع فريق الجامعة ثانيا بحس دايما انى قوى لما اكون على حق يعنى فى اى مشكلة بقع فيها مهما كانت معقدة مادمت على حق ببقى فى منتهى القوة والعكس وبحس انى ضعيف اوى لما اشوف حد معاة واسطة وبيتميز عنى بالواسطة دى ساعتها بحس انى لا شى وعلى فكرة بردو نقطة ضعفى الاطفال بتعامل معاهم كانى طفل زيهم ثالثا لو انا رئيس الجمهورية اول حاجة هعملها هخصص نصف ميزانية البلد للبحث العلمى ومش مشكلة الشعب يجوع وفى حاجات كتير تانية بس مش لازم اقولها عشان مانروحش فى داهية احنا الاتنين رابعا سؤال صعب اوى عشان صدقينى ماينفعش اخسر اعز صحابى عشان حبيبى او العكس لان الاتنين بيكملو بعض ومقدرش استغنى عن حد فيهم خامسا بالنسبة للشخصية اللى مابرفضش ليها طلب هى اختى دى بقى مااقدرش اقولها لا مهما طلبت منى سادسا بحس بالحرج لما حد بيستنجد بيا عشان احل لية مشكلة او موضوع مضايقة وما بعرفش ببقى محرج من نفسى اكتر مااكون محرج منة وبردو لما بظلم حد واكتشف انى كنت ظالمة سابعا العضو اللى نفسى اخنقة اكيد مش انتى واللة بصراحة مفيش واللة وان كان ساعات كدة جمال بيضايقنى وببقى عايز اخنقة بس بتراجع للاسف ثامنا هخلى ماما تحج لان بابا عملها قبل كدة \ حد خاننى ايوة واحد صاحبى كدة بس كان موضوع وخلص \بحب الاتنين بالنسبة للقديم العندليب طبعا اما الجديد الهضبة عمرو دياب بالتاكيد واليسا بردو وشرين ونانسى بس عمرو هو التوب\نفسى يرجع بيا الزمن بس على فكرة مش عشان اخش كلية تانية غير بيطرى بالعكس هخشها تانى لكن عايزة يرجع لان فى حاجات كتير عايز اصلحها ومش عارف وفى زكريات نفسى ترجع تانى بس للاسف مش هينفع

منووووووووووووور يادك ربنا يعينك بصراحه حاسه ان الاسئله اللى فاتت خلصت عليك خالص بس يلا ماعلينا اكمل عليك بالمره

ايه الامنيه اللى نفسك تحققها حالا؟؟؟؟
ايه السلبيات اللى فيك ونفسك تغيرها؟؟؟
لو حد ظلمك بيكون ايه رد فعلك ساعتها ناحيته؟؟؟
مين اللى بتحس انه اكتر حد بيخاف عليك وعايز مصلحتك ؟؟؟
مين مصدر الثقه بالنسبه ليك؟؟؟

ممممممممممم
كفايه كده الرحمه حلوه برضه ههههههه

ماشى يادكتورة ياللا هيا جت عليكى يعنى ربنا يورينى فيك يوم ياجمال وقريب ان شاء اللة بصى يا ستى اولا الامنية اللى نفسى احققها دلوقتى نفسى اصحى من النوم بكرة يقولولى اتفضل شهادتك اهى واحنا اكتفينا بعدد السنوات اللى انت درستها وفى امنية تانية كدة بس ماينفعش اقولها بس ياة لو حصلت بصى هدلع المنتدى بتاعنا دة وهعمل لكل واحد فيكوا منتدى لوحدة وهحقق كل امنياتكوا بس هيا تحصل ثانيا السلبيات اللى فيا انى ابطل نوم شوية ابطل عصبية على الرغم انى ماببطلش ضحك بس ساعة مااتعصب ببقى حاجة تانية برضة اهتم باللى حوالية شويتين ابطل ثقة فى الناس وحسن نية شويتين بردو ثالثا بالنسبة للظلم انا بعيد عنك مابسكتش يعنى هاخد حقى فى ساعتها يعنى هخدة ولو ماخدتهوش مابنامش واللة العظيم لغاية لما اخدة لانك بتحسى ساعتها انك ضعيفة اوى ودة مش بحبة رابعا طبعا والدى ووالدتى طبعا هما اكتر ناس خايفين علينا على الرغم ان احنا مغلبينهم وبنفض لكلامهم كتير خامسا مصدر الثقة باالنسبة ليا هما اصحابى القريبين اوى اكيد فى ثقة بس لحدود معينة ماينفعش نفرط فى الثقة عشان مانتبهدلش بعد كدة

metcho كتب:

ثالثا اكتر حاجة عجبانى فى المنتدى بجد ان احنا كلنا بنكلم بصراحة وفى احترام متبادل بينا وكانة team work فعلا اما اللى بكرهة بجد لغاية دلوقتى مفيش بدليل انى قاعد تقريبا علية معظم الوقت بس اللى انا بتمناة ان المنتدى بتاعنا يوصل لكل طلبة بيطرى ودة دورنا ياجماعة على فكرة

كلامك مظبوط ياجيمى ياللا على البركة

ارى ان الاسئلة قد اتخذت مسارا حارا فللعضو الحق ف الاعتراض عن اسئله منها وهذا للتذكير كما ان له الحق بالسكوت عن بعض منها والتمس من الاعضاء اختيار الاسئلة التى لاتؤذى مشاعر الاخرين وتكون الاسئله مفهومه ومحدده لا غموض فيها هذا فقط للتذكير

يابن الذين ياايمن سكت دهرا ونطق معرفش اية ومال لوماكناش زملكاوية زى بعض كنت عملت اية دلوقتى انا عرفت قيمتك يا اهلوية جدا واللة وبعدين شكرا على ملحوظتك ياجيمى ومفيش مشاكل بينا ماتقلقش وبعدين احنا ولاد كلية واحدة واللى عايز يسال اى سؤال يسال ياجماعة الحرج مرفوع والزعل ممنوووووع بص ياسيدى اولا اول مرة شجعت الزمالك دة كان وانا عندى 7 سنين تقريبا كنت رحت الاستاد مع عماد ابن عمى وكان ماتش الزمالك والاهلى والحمد للة يومها كسبنا 3 \1 تقريبا ايام احمد الكاس وايمن منصور واشرف قاسم تقريبا مش فاكر الاسماء بالظبط ساعتها ثانيا واللة لسة ياايمن ولو عندك عروسة انا جاهز ثالثا بالنسبة للشغل انا حابب مجال الادوية اكتر بس افضل انى اشتغل حر عن شغلى فى شركات وفى بردو مجال الرقابة ربنا بس يسهل رابعا بالنسبة لبنات الدفعة بتاعتنا طبعا هما احلى بنات فى الخمس دفعات بشهادة كل الناس يعنى ومحترمين واللة بس هما فيهم عيب واحد ان هما بيزاكروا كتير اوى حريتة يعنى ودة بصراحة مضايقنا يعنى لو تبص فى اى دفعة تلاقى البنات مثلا 7 او 8 بالكتير شاطرين والباقى عادى لكن عندنا يانهار ابيض حاجة فظيعة وبعدين انا بلاحظ حاجة لما بقعد ورا اى بنت فى المحاضرة بلاقيها بتكتب ب 12 قلم نفسى اعرف ازاى ودة بيعقدنا لاننا زى ماانت عارف مانعرفش غير القلم الازرق واحيانا الاسمر بس هما يبطلوا مزاكرة شوية وهيبقوا تمام خامسا بالنسبة للاكل وسعلى بقى انت جيت فى ملعبى وزى ماانت عارف اقرب طريق للراجل فعلا معدتة يعنى لما اقولك كدة ياايمن مثلا مكرونة بالباشاميل مثلا ولا صنية بطاطس فى الفرن ولا المقلوبة لو مش عارف المقلوبة اشرحلك بتتعمل ازاى والمحشى والطواجن كفاية بقى بلاش اكمل تانى سادسا بالنسبة للدكاترة بجد احنا الدكاترة بتوعنا محترمين جدا وفى مساحة للحوار بينا عكس بقية الكليات واسال وبجد الحلو اكتر من الوحش بكتير فمقدرش اعدلك هما اد اية لانهم كتير واللة وشكرا ايمنز

ولا المقلوبة لو مش عارف المقلوبة

ايوه يعنى ايه دى بقى؟؟؟؟؟؟؟ اهه منكم نستفيد ياجناب الشيف

اقرب طريق للراجل فعلا معدتة

حلو الاعتراف ده اوى يادك بس عارف ايه المشكله ان بنات الايام دى مش هتعرف تقرب لاى واحد لاننا فى المطبخ حاجه ماحصلتش تفكركوا بالحرب العالميه نار وصويت وبهدله
ههههههههههههههههههههههه

ههههههههههههههههههههه

كل دى اسئله..... الله يعينك

بس ياريت يادكتور ترقم الاجابات يعنى وتسيب مسافه مش تكتب كله على بعضه بنتوه احنا

goooooooo ooooooooon

ماشى يا رونا حلوة وكمان زملكاوى معرفش هو دة متعب فى اية بس ماشى
1\بالنسبة للزمالك عادى واللة دة انتماء وحاجة الواحد بيحبها ومفيش مانع انا زملكاوى واهلوية جدا اللى غيظانى بتشجع الاهلى وعادى الدنيا لازم تمشى اما مسالة انة كان بيخسر طبعا كنت مضايق لان لما تشوفى شى كبير اوى وبينهار بتبقى مسالة صعبة بس تالحمد للة
2\ بالنسبة لمواصفات شريكة الاحلام طبعا مسلمة متدينة بس معتدلة فى افكارها شوية تكون على درجة علمية زى حالاتى يعنى بيطرى بشرى صيدلة هندسة علوم لازم يبقى فى توافق فى الحتة دى طبعا تكون على قدر من الجمال من اسرة محترمة ومش شرط تكون زملكاوية على فكرة وان كان بعد الجواز ان شاء اللة هعرف اغير دة واعملها مسح دماغ كامل وهخليها تحب الزمالك اكتر منى هههههههههه
3\اة السعودية ان شاء اللة بس ربنا يسهل اما البلد اللى نفسى ازورها طبعا تركيا واليونان
4\بالنسبة لعريس اختى هيا اجوزت خلاص بس لو افترضت ان لسة طبعا لازم يكون بيعرف ربنا ويتقى ربنا فيها لازم يكون من نفس الطبقة العلمية وبردو من مستوى اجتماعى قريب وياريت لو كان زملكاوى ه ودة حصل فعلا لان اختى اجوزت ابن خالى ودة زملكاوى زينا والحمد للة هههههههههه
5\بالنسبة للمزاكرة يارونا حرام عليكى الصبيان عامة ماعندهمش صبر انهم يقعدوا ساعة على بعضها قدام الكتاب وبعدين مشاغلنا كتير لعب وخروجات وحوارات وبعدين احنا هنقرف نفسنا من دلوقتى لا خلينا نستمتع بحياتنا دلوقتى وبعد مانتخرج هيطلع عنينا ماتقلقيش يعنى

ايمن حبيب قلبى اوعى تتعصب او تزعل واللى يرشك بالمية هنرشة بالدم انت وراك رجالة واسال زى ماانت عايز ولو جمال زعلك سيبهولى انا بس ومالكش دعوة