الحلقة الخامسة من كرسى الاعتراف

ان سبق وقلتلك ان موقفنا السياسي واحد
لكن انت ليه بتكره بابي
مبارك
ده حتى من المفروض تكون من الحتفلين بعيد ميلاده اليومين دولي

لو مش عايز تجاوب ده حقك
بس جاوب بقى على
1-انت بتحححححححب مصر بجد؟
3-لو انت مش مصري نفسك تبقى ايه؟
3- ناوي على ايه بعد التخرج؟


NB :صغيرة خالص
قبل ما تجاوب
سجن القناطر بقولوا واسعوه اليومين دول

تحيا ج م ع [ندعوك للتسجيل في المنتدى أو التعريف بنفسك لمعاينة هذه الصورة]

بسم الله الرحمن الرحيم
أولا:- كرسى الإعتراف يا جمال ؟ أنت مش عايزنى أمتحن معاكم ولا إيه ؟ وبعدين عبد الرحمن يقوللى أنت بتحب مبارك ولا لأه إيه يا جدعان أنتو كلكوا عليا ولا إيه ؟
ع العموم أنا سعيد بأسلتكم وأرجوا إن إجاباتى تكون وافيه ومرضيه لزمايلى الأعزاء ويكون فيها خير ليا وليكم

فى البدايه يا عبد الرحمن أنا عايز أوضحلك حاجه أنا لا أكره مبارك الإنسان ولكنى أبغض مبارك الرئيس بكرهه كل ما بسمع عن واحد قتل ولاده ومراته وبعدين نفسه من الجوع والفقر وهوا عايش فى القصور وكله من مال الشعب, بكرهه لما بشوف الناس بتضرب بعض على أفران العيش والستات بتحارب الرجاله وبتنزل لمنزله هى أكرم عندى منها بكتير فى الألفاظ والأفعال بكرهه كل ما أسمع إن رجل أعمال خد قرض من البنوك وهرب بره البلد علشان فى لحظه يبقى مليونير والناس فى لحظه تبقى أفقر مما كانت عليه بكرهه لما بشوف المصرى بيهان فى كل مكان وبينتقص من حقه كأنه أصبح مواطن بلا سلطان من حق جميع سعوب العالم إنها تديله على قفاه ( لا مؤاخذه ) وكرهته أكتر وأكتر وأكتر لما شوفت موقفه أثناء الحرب على غزه وهوا بيتكلم بكل برود وبلاده وكإن الفلسطينيين كلاب بتقتل ببنادق صيد لا يبكى عليهم أحد . المسلمين وخصوصا فى مصر كانت قلوبهم بتعتصر ألم من مناظر أطفالنا اللى جثثهم ملقاه فى الشوارع وأمهاتنا اللى بينزع عنهم حجابهم وبيهتك سترهم بكل تبجح من الملعونين من بنى إسرائيل وهوا حاطط أعصابه فى تلاجه
وغير كده كتييييييييييييييييييير وفضايح الفساد اللى موجوده فى حكومته وبقينا بنسمع عنها أكتر ما بنسمع المساسلات فى التليفزيون وحال البلد اللى بتقتل المبدعين وتقتل فيه إبداعهم وبتتعامل مع العلم على إنه صفقه تجاريه فاشله ملهاش لزوم طالما هوا ومراته وولاده وألاديشه بياكلوا ويشربوا ويلبسوا ولازقين فى الكراسى بتاعتهم يبقى تولع الدنيا باللى عليها ولا يهمهم من أى حاجه بعد كده .
والأهم من ده كله واللى مخلينى نفسى أغيره النهارده قبل بكره هوا الديموقراطيه اللى عمال يتغنى بيها فى كل حته ويقول إن المصريين أصبحوا ينالون قدرا من الحريه والديموقراطيه لم يعهدوه من قبل وتلاقى السجون خلت من الحراميه والنصابين والمرتشين وأصبحت تضم فقط أصحاب الفكر وذوى الرأى والإنتهاكات اللى بتحصل فى السجون وطرق التعذيب المقيته والاأخلاقيه والاإنسانيه ده كله فى رقبة مين الناس اللى ماتت فى العباره وماحدش جاب حقهم فى رقبة مين والناس اللى بتموت من الجوع كل يوم فى رقبة مين والناس الى بتبيع أعضاءها لتجار الأعضاء اللى علشان يعمل عمليه لإبنه اللى علشان يجهز أخته الناس ده فى رقبة مين ؟
رحم الله عمر بن الخطاب الذى قال لو عثرت بغلة فى العراق لسألنى الله عنها لم لم تصلح لها الطريق يا عمر مصر مليانه بنى آدمين يا ريس تصعب على الواحد أكثر من البغال وكل مره يقول هنحسن أحوال المواطنين والدوله تعمل جاهده لتحسين أجور محدودى الدخل والرقى بالمواطن المصرى من 30 سنه زلحد دلوقتى مش عارف طيب يسيب غيره يمكن يعرف ولو ما عرفش نشوف غيره ونفضل كده لحد ما ييجى اللى يعرف وده من حقنا نحن المصريين
ده كله وتقوللى بتكرهه ليه يا رااااااااااااااااااااااااااااجل

أما عن أسئلتك فأنا هجاوب عنها بكل حب وتقدير
1- أنت بتحب مصر بجد؟
قبل ما أجاوبك على السؤال ده
كان هناك أحد السلف يقول إذا سئلت هل تخشى الله فاصمت ولا تجب فإنك لو قلت لا كفرت وإن قلت نعم كذبت لأن خشية الله يجب أن تحول بينك وبين معاصيه
والأمر متشابه فأنا بالطبع أحب مصر ولكنى لم أختبر أبدا هذا الحب لأعلم مدى صدقه فلم أحارب من أجلها ولم أتعرض للإيذاء فى سبيلها فكيف أعرف أنى أحبها ؟
ولكن أسأل الله إذا أتى اليوم الذى يجب على فيه أن أدفع مقابل حبها أن يثبتنى وأن يقوينى فثمن هذا الحب غال جدا ولا يعلمه إلا من دفعه
2- لو أنت مش مصري نفسك تبقى إيه ؟
أنا لو مش مصري فيكفينى فخرا أننى مسلم ولو كنت سأعيش بهذه الهويه وفقط فكفانى شرفا أن من أختارها لى هو ربى وأدعو الله أن يمكننى من شكر هذه النعمه وأردد قولة السلف " الحمد لله على نعمة الإسلام وكفى بها من نعمه " أما لو بتسأل عن الوطن فأى وطن ولدت فيه وتغذيت من أرضه وعاشرت أهله فحبه واجب على والدفاع عنه من الإيمان فحب الأوطان من الإيمان كما نقل عن النبى صلى الله عليه وسلم ولكن أقولك يا عبدو أنا فعلا حب مصر عمانى عن إنى أشوف أى بلد سواها أجمل منها أو أختار أى بلد أخرى عليها ونفسى بجد أشوف مصر أقوى من أمريكا وأغنى من الإتحاد الأوروبى مجتمعا وأكثر تعدادا من الصين وأجمل من باريس وروما وعلى فكره أنا بحب المصريين جدا أهلاويه وزملكاويه ومسلمين ونصاري وكل واحد له منزلة فى قلبى
3- ناوى على إيه بع التخرج ؟
والله بس نتخرج الأول يا عبدو و ع العموم إن شاء الله فى أجازة السنة دى أنا ناوى أتدرب فى الوحدة البيطريه مع دكترو بيطرى صديق والدى وهوا على فكره معاه دكتوراه فى الولاده من عندنا من الكليه بس مش أستاذ ولو لقيت نفسى أنفع وحبيت المجال ودماغى إشتغلت فيه يبقى خيط وبكره أما لو كان الأمر غير كده يبقى عليك وعلى الأدويه وبرده محلوله ليا صديق والدى عنده شركة أدويه ويتمنى يخدم ولو الموضوع مامشيش يبقى نفتح مشروع خاص وأنا بفكر كتير أوى فى توكيل أعلاف ولو الدنيا أزمت معايا وسدت أبوابها فى وشى يبقى همسك شغل المقاولات بتاع والدى وأنا أشتغلت معاه قبل كده وعندى فكره مش بطاله ويبقى هوا يتفرغ لشغل الهندسه بتاعه لكن أكيد مش هسيب 5 سنين يروحوا من عمرى فى الكازوزة وهدنينى ورا الحيوانات يا أحبهم يا أخلص عليهم المهم لازم أكون دكتور بيطرى بمعنى الكلمة ومش هيأس أبدا لأنه كما قال الزعيم مصطفى كامل لا يأس مع الحياة ولا حياة مع اليأس وكل ما الدنيا تقفل فى وشنا باب نروح ونخبط على باب تانى لحد ما تزهق وتفتح لنا دراعاتها وتاخدنا بالأحضان
أما بأه بالنسبه لموضوع الجواز والكلام الفاضى ده
فأنا لن أتزوج قبل سن الثلاثين لأنى شايف إن العشر سنوات دول من حقى أنا وبس ومش هجيب واحده تنغص عليا عيشتى فيهم وأعيشهم بكل حريه وإنطلاق وأعمل قرشين كويسين وبعد كده أتنيل أتجوز واحده وأصرف عليها القرشين دول ما هيا دى خيبة الرجاله بس لا بد منها أنا أصلى كبير إخواتى والحاج عايز عيال توأوأ فى البيت
يلا ربنا ييسر الأمور ويدينا طولة العمر ونحقق كل اللى بنحلم بيه
وشكرا يا عبدوا على المرور الكريم ده بس عايزك تعرف حاجه..... أنا لو إتشديت هقول إسمك مع أول قلم
ههههههههههههههههههههههههههههههههههههههههههههههه
سترك ياااااااااااااااااااااااااااااااااااااااااااااااااااااااااارب

اسئلتى انا
ورد باختصار
بصراحه مفيش وقت حد يقرأ الاجابه الكبيره دى
1\ انت ليه شايف ان البرادعلى ينفع رئيس لمصر محدش غيره رغم ان فى ناس احسن منه
2\ اكتر موقف هزك وانت صغيروخاصا فى شغل المقاولات يعنى اتعاملت مع العمال البناين وشفت قد ايه هما بيتعبوا وهيخليك لو اشتغلت الشغله دى هتغيره
3\ حاجه اتعلمتها وناوى تزرعها فى اولادك ان شاء الله
4\لو نفسك تعمل عمل خيرى للمسلمين هيكون ايه
5\هتغصب اولادك على التعليم ويدخلوا كليه مش بيحبوها
6\تتمنى تكون رئيس الجمهوريه ولا لاء
كفايه كده اجابه مختصره لو سمحت وشكرا
تقبل مرورى

منور يادكتور بس بصراحه اجابات حضرتك فكرتنى بكتب الكليه ههههههههههه
لاطبعا انا بهزر بس اصلها طويله حبتين تلاته المهم انا بعد اذنك هسأل كام سؤال

1/لو لقيت يوم جدار تكتب فيه كلمه او جمله عنك تفضل طول العمر لكل الناس ايه هى؟
2/لو ماكنتش انت كنت تتمنى تكون مين وليه؟
3/ايه اكبر كدبه انت شايف مجتمعنا بيعيشها دلوقتى؟وايه الحل عشان نتخلص منها؟
4/ايه الميزه اللى انت شايفها فى الشعب المصرى واللى بتميزه عن باقى المجتمعات بالرغم من السلبيات اللى فيه؟

مممممممم
كفايه كده

منور يادكتور بس بصراحه اجابات حضرتك فكرتنى بكتب الكليه ههههههههههه
لاطبعا انا بهزر بس اصلها طويله حبتين تلاته المهم انا بعد اذنك هسأل كام سؤال

1/لو لقيت يوم جدار تكتب فيه كلمه او جمله عنك تفضل طول العمر لكل الناس ايه هى؟
2/لو ماكنتش انت كنت تتمنى تكون مين وليه؟
3/ايه اكبر كدبه انت شايف مجتمعنا بيعيشها دلوقتى؟وايه الحل عشان نتخلص منها؟
4/ايه الميزه اللى انت شايفها فى الشعب المصرى واللى بتميزه عن باقى المجتمعات بالرغم من السلبيات اللى فيه؟

مممممممم
كفايه كده

بسم الله الرحمن الرحيم
أولا أنا بعتذر جدا على الإجابات المطوله دى بس الموضوع كان محتاج كده وعموما مش هيتكرر تانى
أولا الأخت لؤلؤه - هرد بإختصار ومش هصدعك
1\ انت ليه شايف ان البرادعلى ينفع رئيس لمصر محدش غيره رغم ان فى ناس احسن منه
أنا بساند التغيير مش شرط البرادعى بالذات وأكيد لو ما كانش فيه البرادعى ماكنتش هنتخب حسنى برده ولا إبنه لكن للأسف كل الموجودين على الساحه دلوقتى وظهروا فى الإنتخابات الماضيه مفيش حد منهم سليم أو على الأقل أنا شايف كده لكن البرادعى لم يتلوث بقذارة السياسه فى مصر حتى الآن

2\ اكتر موقف هزك وانت صغيروخاصا فى شغل المقاولات يعنى اتعاملت مع العمال البناين وشفت قد ايه هما بيتعبوا وهيخليك لو اشتغلت الشغله دى هتغيره
السبب الوحيد اللى دفع والدى إنه يشركنى معاه من صغرى هوا إنه كان شايفنى إنطوائى فقال إن الإحتكاك بالنجارين والحدادين هوا اللى هيشجعنى على معاملة الناس وقد كان ولكن فى نفس الوقت بدأت أكتسب عادات سيئه وأسمع ألفاظ غير لائقه كنت برددها أحيانا وأنا صغير علشان أحس إن أنا زيهم بس لما كبرت بدأت لآخد بالى من اللى يتقال واللى ما يتقالش
الناس دى بتتعب وبتنفعل وبتسب الدين وبتشتم بس ده كله علشان يداروا القسوة اللى بتعاملهم بيها الحياه والمجتمع

3\ حاجه اتعلمتها وناوى تزرعها فى اولادك ان شاء الله
حاجه إتعلمتها من والدى وهى بر الوالدين
والدى هو أصغر أخوته وهو الوحيد المتعلم تعليم عالى ( هندسه ) وهو أيضا الوحيد بينهم ميسور الحال جدى كان تعب فى آخر أيامه بالسرطان وكان بياكل كل يوم حته من جسمه وكنت بشوف والدى بيعمل معاه إيه وكنت بشوفه على إستعداد إنه يضحى بكل ما يملك علشان مايسمعش جدى بيقول آه من الألم
جدتى كانت عايشه مع عمى الكبير فى بيت العيله ولما والدى إنتقل من بيت العيله صمم إنه يا خدها معاه وحصلت مشاكل بينه وبين عمى لكنه فى الآخر خدها معاه وهيا دلوقتى عايشه معانا ووالدى ووالدتى بيخدموها بعنيهم ومش مخليها عايزه حاجه

4\لو نفسك تعمل عمل خيرى للمسلمين هيكون ايه
نفسى أغنياء المسلمين يشتركوا مع بعض مع أموال الزكاه ومساعده من الدوله ويتم إنشاء مؤسسه إقتصاديه تعمل فى جميع المجالات وتعود أرباحها على الفقراء والمساكين واليتامى والأرامل
نفسى ما أشوفش مسلم بيمد إيديه لحد ولا أم بتشحت علشان تأكل أيتامها

5\هتغصب اولادك على التعليم ويدخلوا كليه مش بيحبوها
أكيد مستحيل لأن التعليم مش فى الطب ولا فى الهندسه بس التعليم فى كل مكان حتى فى التدريب المهنى بس المهم ولادى يحبوا اللى بيتعلموه علشان يبدعوا فيه

6\تتمنى تكون رئيس الجمهوريه ولا لاء
أنا عمرى ما تمنيت شخص رئيس الجمهوريه يكون حسنى أو البرادعى أو حتى جمال أنا فقط حلمت بأعمال رئيس الجمهوريه اللى تخلى مصر من أقوى وأغنى وأجمل دول العالم
يارب ما أكونش طولت فى الإجابه بس صدقونى أنا بحس بمتعه فى الكتابه وإنى بقدر أعبر بيها عن نفسى أكتر من أى وسيله تانيه ولمرة التانيه آسف

بسم الله ارحمن الرحيم
الأخت بريق الماس أنا الظاهر إنى زعلت الناس كلها بس خلاص الإجابه هتبقى كلمه ورد غطاها

1/لو لقيت يوم جدار تكتب فيه كلمه او جمله عنك تفضل طول العمر لكل الناس ايه هى؟
هتكون عاشق الحريه والإسلام والمسلمين

2/لو ماكنتش انت كنت تتمنى تكون مين وليه؟
كنت أتمنى أكون كعلى بن أبى طالب وفى زمان النبى حتى يقول عنى النبى صلى الله عليه وسلم سوف يأخذ الراية رجل يحب الله ورسوله ويحبه الله ورسوله

3/ايه اكبر كدبه انت شايف مجتمعنا بيعيشها دلوقتى؟وايه الحل عشان نتخلص منها؟
أكبر كدبه بيعيشها مجتمعن الحرية والديموقراطيه وعلشان نخلص منها يبقى لازم نخلص من حسنى

4/ايه الميزه اللى انت شايفها فى الشعب المصرى واللى بتميزه عن باقى المجتمعات بالرغم من السلبيات اللى فيه؟
الميزه التى ميزت الشعب المصرى وعلى مر العصور وهى أنه إذا تجمع المصريون وراء قائد شريف يخشى الله ويهتم لأمر المسلمين فإنهم سوف يغزون خلفه العالم غير آبهين لأرواحهم وقد علمنا ذلك حين تجمع المصريون خلف السلطان الناصر أيوب ضد الإفرنج ( الفرنسيين ) وخلف صلاح الدين ضد الصليبيين وخلف سيف الدين قطز ضد المغول
أنا أعشق الشعب المصرى وعلى يقين أنه وحده من بين كل شعوب المنطقه قادر على أن يغير وجه الأرض وموازين القوى فى العالم وإزالة إسرائيل من الوجود ولكن ........... ينقصنا قائد مسلم شريف
يارب ما أكونش طولت وشكرا على مروركم الكريم

هكذا الايام يوم لك ويوم عليك اخى انا لا احب الالحاح ف الاسئله ولكنى سالتك فاجبنى حياك الله
السؤال الاول علمنا ان البرادعى طالب بحذف الماده الثانيه من الدستور والتى تنص ان يكون الاسلام هو نظام حكم البلاد . فما تعليقك؟
الثانى صلاح الحاكم من صلاح المحكومين فليس مبارك هو المسئول عن الفساد بل نحن من نسال هل حاولت يوما ان تسال نفسك ماتقصيرك واردت ان تغير من نفسك؟
الثالث والاخير لو كنت انت حاكم البلاد فماذا انت صانع بها؟

الأخت بريق الماس أنا الظاهر إنى زعلت الناس كلها بس خلاص الإجابه هتبقى كلمه ورد غطاها


انا اسفه يادكتور والله ماقصدتش ازعلك خااااااااااالص ده كان على سبيل الهزار

بسم الله الرحمن الرحيم
الأخت بريق الماس أنا طبعا عارف إنك بتهزرى وأنا كمان كنت بهزر إحنا إخوات وزمايل فى كليه واحده وأتمنى إن إجاباتى تكون وضحت ليكى اللى إنتى عايزه تعرفيه وربنا يرزقنى وإياكى الإخلاص يوفقنا إلى ما فيه خير الإسلام والمسلمين

أما بالنسبه للأخت قدوتى برسولى فبقولها أولا حياكى الله وربنا يزيدك إقتداء بالمصطفى


بالنسبه للسؤال الأول .................. أنا كمان سمعت كلام زى ده ولكن ما أعرفش أصل للكلام ده هل هوا إشاعات بتروجه السلطه الحاليه علشان تقلل من مؤيديه لأنها تعلم مدى تعلق المصريين بهذه الماده من الدستور
وممكن يكون الكلام صحيح

تعالى نبدأ ........ أولا البرادعى لو كان طالب بكده فهو غلطان عارفه ليه لأن الماده دى مش موجوده أصلا
وكأنها نسخت حكما وبقيت لفظا .... فين الشريعه الإسلاميه اللى بتحكم المسلمين وفين القوانين اللى بتعتمد على الشريعه كمصدر أساسى القوانين المصريه كلها قوانين وضعيه
أولا عارفه مين اللى أسس الدستور المصرى بعد سقوط الملكيه وإعلان الجمهوريه ؟
مجلس قيادة الثوره وعلى رأسهم جمال عبد الناصر وهو الذى أصر على هذه الماده وعلى أن تكون ثانى مواد الدستور بالرغم من وجود نصارى فى مجلس قيادة الثوره وكان الموضوع ده مسبب لهم حساسيه ولما راجعوا جمال فيها أصر على موقفه عارفه ليه ؟
مش حب للإسلام ولا إيمان بأن الشريعه الإسلاميه هى القادره على حكم بلاد المسلمين
أمال إيه السبب اللى جعل عبد الناصر يتمسك بالماده دى رغم عدم إيمانه بيها ؟


عارفه إيه ......... عبد الناصر كان يعلم طبيعة الشعب المصرى ومدى حبه للإسلام حتى وإن كان بعيدا عنه ولكنه رغم ذلك لا يرضى أبدا أن ينال أحد من دينه وده كارت لعب بيه عبد الناصر مع المصريين فزادت شعبيته وزاد حب الناس وإيمانهم بالثوره
وفى نفس الوقت فتح عبد الناصر السجون على مصراعيها فى وجه العلماء وحتى ضجت بهم السجون وممن سجنهم عبد الناصر الشيخ كشك الضرير لأنه كان يقول كلمة الحق وممن قتله عبد الناصر من العلماء والمفكرين الإسلاميين الأستاذ سيد قطب قتله عبد الناصر بدم بارد وأشكال تعذيب عبد الناصر للعلماء المسلمين لا يكاد يحصيها قلم ولا مداد لدرجة أنى سمعن أحد المشايخ السعوديين فى خظبة له وهو يتكلم عن الموت وكيف أنه يقصم ظهور الجبابره فأخذ يقول أين فرعون وأين هامان وأين قارون وأين جمال . ثم إن جمال كان راجل إشتراكى لا يؤمن بالأديان فى قيادة الشعوب
عرفتى دلوقتى ليه أصر جمال على الماده دى من الدستور .... مجرد كارت يكسب بيه ود وتعاطف المصريين ليس أكثر ولا أقل
وقد علم مبارك ذلك فترك الماده على حالها طالما أنها لا تضره ولا تردعه عن فعل ما يريده وإلا لكان غيرها على ما يوافق هواه كما فعل بالمواد 76 و 77 و88
ده رأييى وطالما أنها ماده معطله يبقى وجودها أو عدمه مش هتفرق وبعدين إحنا مسلمين والمسلم دستوره القرآن والسنه وليس دستور جمال عبد الناصر وحسنى مبارك

فى نفس الوقت الدكتور محمد البرادعى لم يعلن برنامج إنتخابى بعد حتى نحاسبه على ما جاء فيه وحتى لو كان قال كده فدى كلها ترهات وتأثير سفر وغيبه لكن لما يراجع نفسه ويعرف إنه ده هيقلل عدد مؤيديه هيتراجع عنه لأنه راجل سياسى والسياسيين دول ممكن يبيعوا أبوهم لو هيتعارض مع مصالحهم



أما بالنسبه للسؤال الثانى ............ فأنا عارف إن صلاح الحاكم من صلاح المحكومين وأن الله إذا سخط على قوم ولى عليهم من يفسد فيهم
ولكن سؤال هل لو لم يكن هناك رسول الله صلى الله عليه وسلم فهل كان سيوجد أبو بكر وعمر وعثمان وعلى وطلحه والزبير وخالد بن الوليد وأبو عبيدة بن الجراح وغيرهم من سادة الأرض ؟
بالطبع لا فالقائد العظيم محمد رسول الله هو الذى ظل يربى هؤلاء الساده فى مكه 13 سنه على الإيمان والتقوى ثم هاجر بهم إلى المدينه المنورة ليجعل منها نواة لدولة إسلامية عظيمه ويجعل من أصحابه هؤلاء نواة لجيش إسلامى عظيم


ثم أن الله سبحانه وتعالى من حكمته أنه يقيض للحق أعداء كى يحاربوه فينتشر الحق بين الناس ويعلمه من كان يجهله مثل ما حدث فى جريمة سب النبى المصطفى كان خيرها للإسلام أكثر من ضرها للمسلمين فقد بات العالم كله يعلم عن الإسلام ثم أخذ المثقفون يبحثون فى بطون هذا الدين وأكثرهم آمن وأسلم ..... فسبحان الله قد قيض الله هؤلاء الكفرة لينشروا دينه وهم لا يدرون ويظنون أنهم يحاربونه
كذلك الأمر فقد يقيض الله للمسلمين حاكما ظالما يقهرهم ويستعبدهم وينال من كرامتهم ولربما من دينهم حتى يوقظ الله فى قلوبهم الإيمان ويعودوا إلى دين الله ويعلمون أن فيه الخلاص فينقلبوا على ذلك الحاكم الظالم ويقيموا شرع الله فيهم بكل رضا وسرور وليس قهرا وإستعلاء من بعض من يدعون أنهم إسلاميون ويريدون حكم الدين ويزايدون على ذلك
فأنا أنظر إلى الأمر من ذلك الجانب وأن فساد حاكمنا ليس من فسادنا وإنما هو رسالة من الله حتى يوقظ فينا الإيمان ويخبرنا أن الخير كل الخير فى الإسلام وفيمن يأتى به الدين وليس فيمن يأتى به دستور جمال عبد الناصر وحسنى مبارك



وطالما أن ذلك الخيار الإسلامى لن يكون متاحا الآن فعلينا أن نساند من سيجلب لنا هذه الحرية أو نتوسم فيه ذلك ثم بعد ذلك هذه الحريه هى التى ستمكننا من رفع الإسلام على رأس السلطه سلميا وبذلك نجنب البلاد والعباد هول الدماء




فلو كان الرجل شريفا كما توقعنا فاللهم لك الحمد وإن كان غير ذلك فلا أظنه سيكون أسوأ ممن هو موجود الآن وبذلك يطول أمد الفساد حتى يبعث الله من بين أظهرنا شريفا نقف خلفه

أما أن أكون حاكم فهذا شئ لا أتمناه فلا أظننى قادر على أن آتى الله يوم القيامه وفى رقبتى 85 مليون مصري كل واحد له عندى مسأله لم أجبها له فى الدنيا
أما لو قدر الله ذلك فأظننى سأرجع إلى كل ما يرضى الله فى أمر عباده فأفعله وأول أمر أود أن أقوم به هو أن أصحح للناس عقائدهم ودينهم بأن أمكن للعلماء وأنقى الأزهر من أولئك الذين شوهوا سمعته وأحطوا من قدره
ثم بعد ذلك من يرجع للشريعة فى كل أموره أظن أنه لن تطول حيرته فى أى أمر من الأمور لأن رسول الله صلى الله عليه وسلم لم يترك شيئا إلا وأخبرنا عنه



وشكرا على رحابة الصدر لقراءة كل هذه الإجابه
وأعتذر إلى كل من طلب منى الإختصار فقد حاولت ذلك ولكن حين أجد الأمر يستحق المزيد لا أستطيع أن أمنع نفسى من الكتابه
sorrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrry

بسم الله الرحمن الرحيم
طيب أنا دلوقتى هكلم الأسره كلها ولا هكلم فرد واحد ولا إيه
ع العموم أحبكم فى الله ولو كان كاتب التعليق ده هوا اللى فى باللى يبقى أعشقك فى الله والله
أولا أكيد التغيير منوط بكل فرد فى المجتمع المسلم وكل واحد عليه مسئوليه هناك من كان على قدرها وهناك من خانه عزمه وشجاعته فلم يؤد ما عليه ولكن لا يمكن أن يتنصل واحد من هذه المسئوليه ولو تنصل منها فى الدنيا فأنا على يقين أنه لن يستطيع أن يتنصل منها أمام الله فى الآخره


بالطبع فصلاح المجتمع لن يكون إلا بصلاح أفراده وعلى رأسهم القاده الذين هم رأس المجتمع فصلاح القائد وحده قد يوازى صلاح كل أفراد المجتمع وفساد القائد وحده قد يؤدى إلى فساد كل أفراد المجتمع إلا من رحم ربى
فالرأس إذا صلح صلح الجسد وإذا فسد فسد الجسد وهكذا علمتنا السنة النبويه



شايف إن الإسلام ينفع منهج حياه ؟
إذا كان الله سبحانه وتعالى قد إرتضاه لعباده من فوق سبع سماوات دينا ينظم كل أمور الحياه ولم يترك جانبا منها إلا وكان له رأيه فيه وعلى هذا أقام الله دولة المسلمين فى الأرض




ولعل واحد يسأل لماذا أرسل الله سبحانه وتعالى نبيه ورسوله محمدا صلى الله عليه وسلم رسولا وقائدا ورجل دولة وحاكما ؟ وقد سمعت الشيخ أبا إسحق الحوينى يقول أنه لا يعلم نبيا قد مكن الله له فى الأرض وأعد له جيشه ليقيم دولته إلا إثنان نبى الله داوود عليه الصلاة والسلام ونبى الله ورسوله محمد صلى الله عليه وسلم
لماذا لم يرسل الله سيدنا محمد على النهج الذى أرسل به نبيه عيسى وموسى يؤمن الناس بالله ولكن الله لم يطلب منهم أن يقيموا دولة ( ليس هذا سؤال إستفسار وإنما سؤال تقرير لأن الله لا يسأل عما يفعل وهم يسألون ) والإجابة واضحة للعيان وهى أن هذا الدين دين الإسلام هو عند الله بمنزلة تجعله يأبى أن يترك هذا الدين للناس وإنما لابد لهذا الدين أن تكون له دولة تحميه وتدافع عنه وفى نفس الوقت فإن هذه الدولة تقوم عليه بالأساس وبهذا فالدولة تحمى الدين من أعدائه والدين يقيم الدولة ويشد عضدها ضد أعدائها
وبهذا لا يمكن الفصل بين دين الإسلام ودولته لأن كلاهما شئ واحد وهكذا نزلا من عند الله
وإلا لما حمل الله نبيه وصحابته مشقة الهجرة ومتاعبها من أجل أن يقيم لهذا الدين دولته فى أرض جديدة لا يعلمها هذا النبى ولا أصحابه ولكن أمر الله لا يرده ملك مقرب ولا نبى مرسل فكيف رده عباد ضعفاء هم أحوج إلى رحمة الله من أن يستجلبوا غضبه



أنا أؤمن بأنه لا يستقيم أمر المسلمين إلا فى دولة إسلامية حقيقية وليست مزيفة كما هى الحال فى بلاد تدعى أنها إسلاميه ولكنها فى الحقيقة تقهر المسلمسن بإسم الإسلام وتنزع عنهم حريتهم وأظنكم تعلمونها فهى دولة عربية شقيقة تجاورنا ولا نجاورها يفصل بيننا وبينها الماء ولا تجمع بيننا وبينها الدماء
هاه عرفتوها ؟
اللى يعرف الإجابه يخليها فى سره واللى ما يعرفش يسألنى وأنا مش هقوله
ههههههههههههههه
فزورة اليوم

مش عارفه ليه حاسه انى فى مسلسل تاريخى

واضح ان الدكتور محمد عنانى موسوعه

ربنا يزيدك يارب

انا معاك ع فكره فى رأيك

مش بتاع الدوله ههههههههههه

لا بتاع الجواز انا بصراحه بستغرب الولاد عموما يعنى انا لو ولد كنت همشى بمبدأك ومتجوزش واحده اصرف عليها

بس دى سنة الحياه ولااااااااااااااااازم تتجوز

سؤال عمرك ماحبيت ولا مقنن مشاعرك؟؟

ايه اكتر موقف محرج اتعرضتله؟؟

هل انت متفائل ان ممكن يحصل تغيير فى بلدنا ع المدى القريب انا عن نفسى اشك لذلك بكبر دماغى وخلاص؟

هل لو عرفت ان بلدنا بتتآمر انها تفقرنا عمداً... هتكرها اكتر....ولا هتيأس من كلامك اللى بتقوله ده وتتاكد ان مفيش فايده
؟

تفتكر ان لو انسان معندوش هدف فى الحياه حتى الان سننا يعنى ....هل ممكن يجده؟ ده سؤال يهمنى

مزهقتش من تشجيع الكوره؟؟؟

بس كفايه كده

إلى الأخت أهلاويه جدا يا مرحب بيكى
أنا عن نفسى بحب التاريخ جدا بس يعنى إيه مسلسل تاريخى ؟



موسوعه......... حرام عليكى ده أنا غلباااااااااان


" لااااااااااااااااااااازم تتجوز "
أكيد هتجوز بس أنا فكرتى إنى ما أتجوزش قبل سن الثلاثين يعنى أنا هخلص الكليه على 22 سنه إن شاء الله ولو قلنا 3 سنين جيش ( أسوأ الحتمالات ) يبقى 25 سنه
ماينفعش أتجوز وأربط نفسى بمسؤلية أسره بدرى أوى كده
وأنا ما أعرفش لسا إذا كنت هقدر أصرف على نفسى ولا لأ
لازم الأول أحارب الدنيا بشخصى فقط ولما آخد منها اللى يجعلنى مطمئن إلى حد ما نبقى نشوف زوجه ما أنا لازم أتجوز وإلا الحاج هيطردنى من البيت
يعنى أنا هسألك سؤال لو أنا واحد متجوز مثلا وكان معايا 10 آلاف جنيه وفى مشروع أرباحه كويسه جدا ولكنها مجازفه والمشروع محتاج كل ال 10 آلاف جنيه تتوقعى هجازف وأخش المشروع ولا لأه ؟
أكيد لأه لإنى هقول لنفسى طيب والست اللى قاعده فى البيت لو خسرت هصرف عليها منين هيا وولادها وأتضايق وأقعد ألعن الجواز والى خلانى أتجوز لأنه حجبنى عن تحقيق طموحى
أما لو مش متجوز هخش وأجازف بقلب جامد وهقول ما حدش بيموت من الجوع وأنا مش هغلب فى إنى ألاقى آكل لو خسرت يعنى وبكده هحقق طموحى
شوفتى الفرق ده اللى أنا أقصده

سؤال عمرك ماحبيت ولا مقنن مشاعرك؟؟
لا مقنن مشاعرى ولحد دلوقتى مش فاهم يعنى إيه أحب بنت وأروح أتجوزها أنا أعرف إنى بحب أمى وأبويا وأخواتى أو على الأقل فاهم النوع ده من الحب أما النوع التانى ده فمش عارف هوا زى ما بنشوفه كده فى الأفلام ولا شكله إيه ........... يمكن علشان ما جربتوش بس ع العموم أعرف إن الواحد ممكن يشوف بنت ويلاقيها جميله ويسأل عليها يعرف إن أخلاقها كويسه وأهلها ناس سمعتهم جميله فيروح يتقدم لها ... ممكن يكون هوا ده الحب اللى الناس تقصده بس كل واحد بيشوفه بطريقه مختلفه


ايه اكتر موقف محرج اتعرضتله؟؟
مش فاكر


هل انت متفائل ان ممكن يحصل تغيير فى بلدنا ع المدى القريب انا عن نفسى اشك لذلك بكبر دماغى وخلاص؟
أنا كمان أشك بس ما أقدرش أكبر دماغى لأن دى بلدى واللى بيأذيها بيأذينى ودول أهلها اللى هما أهلى وكونى إنسان متعلم وعارف حقوقى ( أ وهكذا يخيل إلى..... إن كان ليا حقوق أصلا ) ما ينفعش أتخلى عنهم ولو أنتى كبرتى دماغك وأنا كبرت دماغى وكل واحد كبر دماغه يبقى هنستنى مين اللى يغير ؟..... الأمريكان
ولا نجيب جنود مرتزقه يحاربوا حربنا ؟.... ما ينفعش أكبر دماغى ولا أى حد يكبر دماغه المفروض كل واحد يحس بالمسئولية تجاه بلده ويعمل اللى عليه بإيمان وبجد والنتائج مش بإيدينا دى بإيد ربنا سبحانه وتعالى
الهروب من المسئولية ضعف بس المشكله إن مش كلنا عايزين نحس بيها واليأس ليس من شيم الأقوياء ولا من شيم المسلمين فالمسلمون منهيون شرعيا عن اليأس بل جعل القرآن اليأس كفر بقدرة الله فالله يقول " إنه لا ييأس من روح الله إلا القوم الكافرون " صدق الله العظيم



هل لو عرفت ان بلدنا بتتآمر انها تفقرنا عمداً... هتكرها اكتر....ولا هتيأس من كلامك اللى بتقوله ده وتتاكد ان مفيش فايده ؟
مش بلدنا اللى بتتآمر علينا يا أختى لازم نفرق بين البلد وبين قادة البلاد
البلد بريئه منهم ومن اللى بيعملوه فى أبنائها ما ينفعش أكره البلد وهيا ذنبها إيه
الذنب ذنبنا إحنا........ إحنا اللى كنا السبب فى إن أناس كهؤلاء يصعدون إلى رأس السلطه وعيثون خرابا فى البلاد وظلما للعباد
بل بالعكس إحنا اللى ظالمين بلدنا لأننا ساكتين على اللى بيعملوه القاده فى أبناءها وهتسألنا ومن حقها وهتقولنا ليه ما وقفتوش فى وجه الظلم اللى كان بيقع عليا وعلى أبنائى كنتم خايفين ؟ يبقى مالكوش مكان فى عالم الأقوياء وترضو بأه بفتات الحريه الى بيرميها لكم أسيادكم تحت رجليهم
وعايز أفكر بالمقولة الشهيره وهى أصدق ما حكى التاريخ
الحريه لا تعطى وإنما تنتزع
وصحابة رسول الله الذين كانوا يعيشون العذاب الأليم هل كان يمكن لكفار مكة أن يعطوهم حريتهم هكذا لولم ينتزعها المسلمون منهم إنتزاعا وفقدوا فى سبيلها العديد من أصحاب النبى صلى الله عليه وسلم
هيا دى الحقيقه عايز الحريه يبقى إستعد إنك تدفع الثمن من أمنك وأمن أهلك وراحة بالك ولربما من دمك

تفتكر ان لو انسان معندوش هدف فى الحياه حتى الان سننا يعنى ....هل ممكن يجده؟ ده سؤال يهمنى
بالطبع بس سمو الهدف يعادل مقدار الطاقة التى ستمنحيها من أجل تحقيق هذا الهدف
يعنى لو كان الهدف عالى وصعب المنال فأبشرى بطاقه تهد الأرض الطاقة دى بتنبع من داخل الإنسان نفسة بس إحنا نكون على إستعداد إننا نبذل من وقتنا وجهدنا ومالنا فى سبيل تحقيق الهدف ده
أما لو كان الهدف ده أى كلام يعنى هدف على ما تفرج كده يبقى أبشرى بطاقه مش هتوصلك لباب الأوضه اللى أنتى قاعده فيها
عايزه تلاقى هدفك ؟
دورى جواكى إنتى مستعده تعملى إيه وإيه اللى إنتى بتحبيه وأكيد هتلاقى هدفك وبعد ما تحدديه إستعدى لرحلة البحث عن الذات وتحقيق هدفك بس لازم تحددى وسائلك لكده والأهم إنك تبدأى تاخدى خطوات عمليه وخلى قدام عنيكى دايما الهدف اللى إنتى عايزة تبلغيه ده هيهون عليكى التعب والمشقه وإن حسيتى بزغلله إو بمغص إستشيرى طبيب نفسانى هههههههههههههههه
أنا بهزر



مزهقتش من تشجيع الكوره؟؟؟
الكورة دى حاجه من تلاته يا هتشلنى يا هتجيبلى الضغط....... وخصوصا الأهلى حاله عامل زى حال المنتخب أحيانا يلعب مباراه يحسس الواحد إن خلاص الأهلى عدا وبقى فريق أوروبى خلاص وبعد كده ييجى يلعب ماتش يخلى الواحد يشد فى شعره ويحس إن فرق السله هوا اللى بيلعب مش فريق كرة القدم
هوا ده اللى حاسس إنه هيقصف عمرى بس غير كده أنا بحب لعيبة الأهلى وبحب فيهم الإحترام والأدب وبحب فى الإدارة إهتمامها الشديد بسمعة اللعيبه وأخلاقهم ودى قلما تجديها فى أى فريق تانى



يا رب أكون جاوبت إجابه مفيده ومعبره ............. أنا عارف إنها مش مختصرة بس أحيانا الإختصار قد يفقد الموضوع تأثيره
وشكرا على مرورك الكريم وتقبلى تحياتى