مش باقى منى غير شوية ضى ف عنيا .......... شعر جميل لجمال بخيت .

مش باقي مني غير شوية ضي ف عينيا
أنا هاديهوملك
وامشي بصبري ف الملكوت
يمكن ف نورهم تلمحي خطوة
تفرق معاكي بين الحياة والموت
مش باقي مني غير شوية نبض ف عروقي
خُدي.. وعيشي..
وافتحي لي تابوت
ف كل يوم الصبح
باشرب حليب قبطي
وف النهار والمسا
بامسك ستار الكعبة لو سبتي
واثبت إذا هربتي
أهديكي عمري وحسي وجوارحي
أهديكي جرحي
هو اللي باقي ف دنيتي لما خلص فرحي
مش باقي مني
غير شوية لحم ف كتافي
بلاش يتبعتروا ف البحر
بلاش يتحرقوا ف قطر الصعيد
ف العيد
بلاش لكلب الصيد.. تناوليهم
خدي اللي باقي من الأمل فيهم
وابني لي من عضمهم
في كل حارة مقام
وزوريني مرة وحيدة
لو كل ألفين عام
ألم الجراح يتلم
مش باقي مني غير شوية دم
متلوثين بالهم
مُرين وفيهم سم
كانوا زمان شربات والنكتة سكرهم
شربتهم الخفافيش في قلب أوكارهم
مش باقي مني غير شوية دم.. ماأقدرشي
أسقيكي.. مواجعهم
وبرضه ما أقدرشي أرميكي.. وأبيعهم
يمكن ف مرة تعوزي تطلبيني شهيد
هاحتاج يوميها الدم يمضي علي شهادتي
مش باقي مني
غير شوية قوة ف إرادتي
علي شوية شِعر من خطي
حاسبي عليهم وانتي بتخطي
وانتي ف صبح الدلال
بتعطري شطي..
مش باقي مني
غير شوية ضي ف عينيا
أنا مش عايزهم
لو كنت يوم هالمحك وانتي بتوطي
مش باقي مني..
غير شهقة ف نفس مقطوع..
بافتح لها سكة
ما بين رئة.. وضلوع..
ما بين غبار.. ودموع..
وأنا تحت حجر «المقطم»
ف الدويقة باموت
أنا.. والعطش.. والجوع..
يئن تحتي التراب
وانا صوتي مش مسموع..
ياحلمنا الموجوع..
من المرور ممنوع..
مستني لما يمر موكب سلاطينك..
مش باقي مني
غير شوية رحمة من طينك..
علي شوية صبر من دينك..
الليلة راحت عيوني
تطل ع البستان..
وجناين الرمان..
رجعت لي توصف عناد الغل والدخان
وسحابة سودا تضلل ع الغُنا الغلبان..
رجعت لي توصف هبوب الموت
علي الألوان..
رجعت لي توصف..
.. خيال الذل.. ف موائد الرحمن..
مش باقي مني
غير شوية كُفر بشروقك
وأنا.. منبع الايمان..
مش باقي مني..
غير شوية ضي..
وعينيا مش قادرة تلمحني..
في وحدتي محني..
خايف أموت م الخوف
والضعف يفضحني..
...
السجن عشش ف قلبي
وماشي ف شوارعك..
نفس اللي باعني وخدعني
بالرخيص بايعك..
هاشيل حمولي انا
ولا هاشيل حملك ؟!
ماعدت أملك شيء..
فيكي.. ولا فيّا
ولا قيراط ولا بيت..
ولا نسمة صافية تلاغي النيل بحرية..
مش باقي مني
غير شوية حب جارحّني
ولا باقي مني
غير شوية ضي ف عيني

جميلة جدا انا بحبها قووووووووووووووووووووووووى

تسلم

جميلة جداااا حقيقى بعشق الكلمات دى مؤثرة جدا

مش باقي مني..
غير شوية ضي..
وعينيا مش قادرة تلمحني..
في وحدتي محني..
خايف أموت م الخوف
والضعف يفضحني..
جميلة جداااا

على فكرة القصيدة دى غناها احمد سعد حاجة فى منتهى الروعة

اقتباس :

زي مانت بس حلوه فعلا

انا مش عارف انا كده وحش فى ايه ما انا زى الفل اهه وان شاء الله عمرى ما هتغير .

جميلة جداااا

اقولكم على حاجة بس م تضحكوا كنت عم بفكرها احمد سعد بيغنيها لهيفا بس بعد كدة اكتشفت لهامعانى عالية قوى و احيانا ابكى لما اسمعهابين قوسين وطنية م تحكميش على الحاجة من اولها انفنتيود زيى

ههههههههه لا ياانفنتيود عنانى من 5000 سنة هو عنانى النهاردة مش هيتغير اسألينى انا
عنانى باشا خليك زى ماانت انت حلو انت حلو
يانها ابيض يا shadow احمد سعد هيغنى لهيفاء مش باقى منى غير شوية لحم فلى كتافى حرام يتحرقوا فى قطر الصعيد فى العيد دة اية الرومانسية دى كلها هههههههه

انا مش قولت محدش يتريق ي ميتشو و بعدين مكنتش سمعتها كلها و وصلت للصعيد و بعدين هيفا تستاهل اكتر من قطر الصعيد بكتير و متزعلش نفسك مفيش اكتر من كدة رومانسية

اقتباس :

و بعدين هيفا تستاهل اكتر من قطر الصعيد بكتير

ههههههه يعنى ايه نكتب لها 3 محافظات باسمها يعنى ولا نبنى لها اوبرا تجعر فيها طول النهار
ربنا يتوب علينا وعليها

لو كانت بتجعر كنا لقينا لها صوت يتسمع بس دى ......يلا ربنا يهدى الجميع على رايك دكتور محمد