milk fever

اولا تعريف المرض /
. حمى اللبن هو مرض نقص الكالسيوم والمقصود هنا بنقص الكالسيوم ليس نقص الكالسيوم الذى يحصل عليه الحيوان فى الغذاء ولكن المقصود هنا بنقص الكالسيوم هو نقص الكالسيوم فى دم الحيوان .فمثلا البرسيم معروف بغناه فى الكالسيوم وقلته فى الفوسفور ومع ذلك فان كثره اكل البرسيم للحيوان العشر فى اخر ثلاث اشهر يسبب حمى لبن لان كثره الكالسيوم اللى فى البرسيم بتهبط افراز هرمون مسئول عن خروج الكالسيوم من العظام وكأن الجسم بيقول انا مكتفى بالكالسيوم اللى هيجينى من البرسيم ومش عارف ان فيه عوامل امتصاص وتخزين للكالسيوم دا فى الجسم ممكن تكون عطلانه زى الامتصاص من الامعاء اللى بيكون قليل لما الحيوان يكبر فى السن علشان كدا برضه نقول ان الكبر فى السن يزود فرصه حدوث نقص الكالسيوم .

ثانيا العوامل التى تساعد على حدوث المرض والتى يجب ان نتفاداها /
1- اكل البرسيم الكتير فى اخر ثلاث شهور مش مطلوب واحنا قلنا ليه وكمان يفضل تزود الرده لانها غنيه بالفسفور اللى بينشط الهرمون اللى بيخلى الكالسيوم يطلع وكان الفوسفور عدو للكالسيوم لما يزيد الكالسيوم بتغاظ فيزيد هو بالتدريج برده .
2- اثناء الولاده اذا اردنا ان نستخدم الاستروجين (الفولون) للمساعده فى الولاده فلابد ان نعطى كالسيوم معه وريد وذلك لان الاستروجين يقلل خروج الكالسيوم من العظام ايضا.
3- التعرض لاشعه الشمس وهذا للحصول على فيتامين د المهم جدا فى ترسيب الكالسيوم فى العظام وزياده نسبته فى الدم.
4- البهيمه اللى ولدت اكتر من ولده وكبرت فى السن ( حوالى 5 او 6 ولدات يكفى) لابد من التخلص منها حتى لو جالها حمى لبن فتتعالج وتقول لصاحبها اخلص منها .
5- فقد كالسيوم من الجسم كثيرا مثل اثناء الولاده او فى فتره الحليب الطويله(فتره الجفاف قصيره وهى الفتره من منع الحليب حتى الولاده والحيوان عشر ويفضل الشهر السابع حمل) او كثرت اللبن من الام مع قله التغذيه.

ثالثا الفتره التى تحدث فيها حمى اللبن/
حمى اللبن لابد ان تحدث لحيوان فتى فتره العشر او حيوان لسه والد من فتره وحسب الحالات التى شفتها فهى ممكن تكون قبل الولاده بشهرين او بعد الولاده مباشره او بعد الولاده بشهر ونصف ودا كله يرجع الى كميه الحليب بعد الولاده وفتره الجفاف من الحليب وهى عشر وكبر سن الحيوان .

رابعا . كيفيه حدوث المرض pathogenesis /
ببساطه كدا كل اللى بيحصل ان مستوى الكالسيوم بيقل فى الدم نتيجه لاى سبب من الاسباب السابقه وطبعا دور الكالسيوم معروف فى تحريك العضلات فكل شى بيقف زى الامعاء (ما فيش تبرز) والجهاز البولى (ما فيش تبول) والكرش والحركه تقل والرقود يحدث ( عضلات الارجل ) والقلب بيقل حركته .وكل دا هيفسر الاعراض وكمان حدوث الرعشات بيكون نتيجه ان الكالسيوم بيوثر على حركه الاشارات العصبيه فى الاعصاب فبيحدث التشنجات دى ومن ثم بعدها التخشب .

خامسا الاعراض/
هنا هنقول الاعراض الثابته اللى تخليك تقول ان الحاله دى حمى لبن 100% وهى كالاتى.
1- الحيوان لازم يكون فى فتره عشر اخيره او بعد ولاده بمده الى شهر ونصف او شهرين .
2- الحيوان بيبدأ يترنح فى المشيه وفجاءه يقع وممكن يفضل واقف,
3- الحيوان بيقرض على اسنانه اوى ( مهمه جدا جدا جدا فى جميع الحالات )
4- الكرش واقف تماما
5- التبرز مفيش ولو وضعت ايدك فى المستقيم ممكن تلاقى براز بسيط .
6- التبول مفيش وممكن نقط او كميه ضئيله جدا عن المعتاد.
7- دقات القلب ضعيفه بس مش لازم قليله بمعنى صوت القلب ضعيف لكن مش لازم قليل فى العدد.
لو شفت العلامات دى فى حيوان قول حمى لبن وانا المسئول .
ندخل بقى على الحراره ودى عامل مهم .
الحراره فى حمى اللبن تتراوح من 36 الى 39.5 . مش اكتر من كدا .
ولما تكون 39.5 اعرف ان الحيوان لسه كان بيرعش اوى ودا بيكون نتيجه الهياج اللى بيكون فيه فى البدايه ودى غالبا بيكون الحيوان لسه واقف لكن عنده ميل للرقود .
اما الحاله التانيه انك تلاقى الحيوان نايم على صدره ومش قادر يقوم خالص وتلاقى الحراره من 37 الى 38.5 .
اما الحاله التالته اللى ممكن تشوفها هو ان الحيوان يكون نايم على جنبه ومش قادر يقوم خالص لكن ممكن يتعدل الى الوضع الصدرى مع تخشب فى الارجل الاربعه (بيكون مع حمى اللبن نقص ماغنيسيوم) او متخشب الارجل الاماميه فقط او متخشب الارجل الخلفيه فقط ودى بتكون حمى لبن فقط .ودى بتكون الحراره من 35.5 الى 37.5 .

سادسا / امتى اقول الحاله دى تحتاج كل يوم كالسيوم او يوم واحد كالسيوم او اتخلص منها احسن .prognosis
لو لقيت الحيوان فى الوضع واقفا مع الترنح والقابليه للوقوع مع الحراره المناسبه ( اللى هى من 38 الى 39.5 ) هنا تقدر تقول ان الحيوان دا باذن الله يرجع لطبيعته بعد اول زجاجه كالسيوم تدهاله .
اما لو لقيت الحيوان نايم على صدره وليس لديه القدره على الوقوف نهائيا تقدر تقول انه محتاج الى يومين او تلاته كالسيوم .
اما لو لقيت الحيوان نايم على جنبه ومتخشب وحرارته اقل من 37 تقدر تقول نسبه 30 % ممكن ينفع و70% مش هينفع ويفضل تتخلص منه لو عمر الحيوان كبير الا لو كان عمر الحيوان دا صغير فاستهلاكه للكالسيوم فى الجسم بيكون عالى وبكدا الادويه تجيب معاه.باذن الله . ودا لو اتحسن يحتاج من تلات الى خمس ايام كالسيوم .

سابعا العلاج /
الادويه الاتيه لابد ان تعطى مع بعضها ضمانا لتمام شفاء الحاله بسرعه وشفاء تام باذن الله .
1- كالسيوم مع ماغنيسيوم (كال دى ماج ) افضل نوع ويليه كال بو ماج .وهو اامن علاج لان الماغنيسيوم يعتبر مظبط للكالسيوم فى الجسم والعكس فلو حد زاد التانى يظبطه.

2- محاليل جلوكوز ومحاليل ملحى ( 2 زجاجه و2 زجاجه يوميا حتى تمام الشفاء)(طاقه للحيوان للوقوف )

3- مالتى فيتامين بجرعه 25 سم عضل لمده يومين .(فيتامين د)

4- بريديف 2 x بجرعه 15 سم مره واحده ودا بيحافظ على الهرمون المسئول عن خروج الكالسيوم من العظام فابتالى الكالسيوم هيخرج (parathyroid hormone )

مش عاوزين اكتر من كدا .فى العلاج

ربنا ينفعك بس لو صورتين بس

اشكرك ياحسام بس الصور عليك بقا

شكررررررا اهم حاجة انك ياريت تكتب جرعة ال كال دي ماغ

لالالالالالالالالالالالالالالالا عمو الجرعة بمجرد ان الحيوان يخف بوقف الحقن