هل تفعلينها لو طلب منك ذلك فى ليله الدخله؟

ههههههه
وعاشو اسعد زوجين .....اكيد طبعا بسبب الخمسين الف

اما عن رايى فالست ملهاش غير زوجها وغير الجواز على راى الست امينه

انا لو مكانها هعمل زيها

لسبب بسيط جدا

ان اصلا بيبقى فيه اكل موجود كتير خاصة الحمام عقبالى ان شاء الله "انا مستنيه اليوم ده عشان الحمام"

بس على راى الدكتور حامد عطيه مفيش واحده ست بتغفر لخطيبها انه نسى عيد ميلادها ف الخطوبة فتخيلو بقى الموقف ده اكيد هتذله طول عمره حتى لو فيه 50 الف "فاكر لما .......كذا كذا"

والله أنا لو عرفني إن الموضوع فيه خمسين ألف جنيه ماعنديش مانع خالص
ع الأقل نسدد ديون الفرح
طيب والله فكره ممكن أخليه يضحك على أصحابه وأنا وهوا نبقى متفقين من قبلها وأنا أعمل فيه موافقه ما هو ف الآخر هنعيش في تبات ونبات ونخلف بنات وبنات وبلاش صبيان دي

ياامال ماهو لازم يبقى فيه تريكايه فى الموضوع؟

اما دكتور عنانى"فياريت يبطل تحامل ع البنات مالهم يعنى الدكاتره البيطرى البنات؟
اذا كان اكتر مواد الواحد بيستمتع بيها مواد المستشفى
ولا المفروض البنت تبقى دكتوره بالاسم

حاجه مستفزه

ايه يا عم محمود انت فاضي للحجات دي . انا بحسبك اكبر من كده بكتير

ايه يا عم محمود انت فاضي للحجات دي . انا بحسبك اكبر من كده بكتير

اعمل ايه بس يعنى كده شويه اثاره وجدال ومناقشات بمناسبه امتحانات العملى

اما عن رايى فالست ملهاش غير زوجها وغير الجواز

راى جميل يا نيومون

والله أنا لو عرفني إن الموضوع فيه خمسين ألف جنيه ماعنديش مانع خالص
ع الأقل نسدد ديون الفرح

يا سلام على التفكير السليم هى دى المراه المصريه المدبره هههههههههه

شكرا يا جماعه على مروركم الجميل

اقتباس :

اما دكتور عنانى"فياريت يبطل تحامل ع البنات مالهم يعنى الدكاتره البيطرى البنات؟

بصراحه لحد دلوقتى مش بالعها يا جماعه ...... مش مكانكم والله انتم مكانكم مش البهدله دى أو على الاقل أنا شايفها كده ....... أنا طول عمرى - ومن غير تريقه - ببص للمرأه على أنها كنز ثمين وجوهره غاليه جدا جدا لا تعامل إلا بالرفق ولا يسند إليها عمل صعب ومتعب يرهق من مشاعرها الرقيقه كأم أو كزوجه أو حتى كبنت يا جماعه أنا ليا أخت صغيره صحيح بتخانق معاها كتير بس ساعة ما أبص فى وشها بتضحك بتبقى الدنيا مش سايعانى من الفرح وببقى نفسى أعملها أى حاجه فى الدنيا ........ ده رأيى وأكيد وجهات النظر هتختلف .
أنا مش ضد تعليم المرأه بالعكس أنا شايف ان عدم تعليم المرأه جريمه فى حق أولادها وزوجها قبل ما يكون فى حقها لكن أنا ضد ان تتعلم المرأه تعليم بعيد عن مؤهلاتها كإمرأه سواء كانت مؤهلات بدنيه أو مؤهلات نفسيه أو حتى مجتمعيه لإننا مهما قلنا المجتمع متفهم وكده لكن فى الآخر احنا مجتمع شرقى ولينا عاداتنا برده وماهيش غلط .
أنا ضد أن تعمل المرأه فى عمل يؤثر على دورها الأساسى فى الحياه وغالبا ما ئؤثر عمل المرأه على حياتها الأسريه لإن تجربة عمل المرأه لسا تجربه جديده ومش قادرين نتعاطى معاها صح فى المجتمع فبنطبقها غلط ....... ليه ما بديش لطالب الابتدائى فيزياء ؟
لإن كل عقل وله قدراته وكل مرحله سنيه وليها متطلباتها وكذلك يها امكانياتها اللى تقدر تستخدمها ومش احنا الرجال اللى قولنا ان النساء مختلفه عننا لأ ده الخالق هوا اللى قال كده واثبتت الحياه هذه الحقيقه علشان كده شرع الخالق لها فى الشريعه تشريعات خاصه تحمى كونها إمرأه وتحافظ عليها فى نطاق الرقه واللين .

اقتباس :

حاجه مستفزه

ياترى انا اللى حاجه مستفزه ولا رأيى هوا اللى حاجه مستفزه ؟
عموما مش بالساهل إنك تجد انسان يتقبل النقد فضلا عن إنك تلاقى جنس بحاله - النساء - يتقبل النقد ............... لكن رغم ذلك هيفضل النقد موجود .

أنا عارف انى طولت عليكم ورخمت فى المشاركه بس كان لازم أوضح رأيى علشان الناس ماتقولش عليا متعصب ضد النساء أو متحيز للجنس الذكرى بالعكس أنا أحيانا بنصر أختى الصغيره على إخواتى الولاد وهما اكبر منها وبجيبلها حقها لو حد منهم غلط فيها وده اللى ولد الثقه بينى وبينها لدرجة انها نادرا ما تلجأ لوالدها ودايما بتجيلى .
لازم نولد الثقه بين المرأه والمجتمع وتثق المرأه إن المجتمع مش بيحاول يهمشها أو ينتقص منها أو ينال من قدرها لإنها فى النهايه إما أم لأفراد المجتمع أو أخت أو بنت أو زوجه وفى النهايه دى أمانه ووصية النبى صلى الله عليه وسلم لما قال " اتقوا الله فى النساء " .

ماشى طب ماتقولنا ايه اللى المفروض ندرسه او نشتغله كبنات يعنى؟؟
انهى كلية يعنى بناتى ف وجهة نظرك
عشان مناخدش برأيك
اقصد ناخد برأيك

يا سلام ع الكلام

على فكره مافيش ولد أو بنت داخل الكليه دي حبا فيها كلنا التنسيق هوا اللي جر رجلينا ليها
أما معظم البنات داخلينها عشان بس لقب دكتوره الدكتوره راحت الكتوره جت وف الآخر سواء الكليه دي أو غيرها برضه هنقعد ف البيت أو أنا عن نفسي هقعد ف البيت

بصراحة انا مش مصدقة ان دة كلام دكتور عنانى كدة هتخلينى اغير فكرتى

انهى كلية يعنى بناتى ف وجهة نظرك


تربيه رياضيه بنات هههههههههههههه

براحه شويه يا جدعان فى المناقشات انا لو اعرف ان ده هيحصل ماكنتش هنزل الموضوع ده اصلا

بسى برده اختلاف الراى لا يفسد للود قضيه

بصوا الموضوع كلة يتلخص فى ان احنا مش ضد تعليم المرأة او حتى دخولها بيطرى لكن المشكلة اللى بنواجهها ان عدد البنات فى الكلية اكتر من الصبيان بالرغم ان امفروض العكس لان دى كلية عملية محتاجة اكتر للصبيان وبعدين البنات بصراحة يعنى فى السكاشن مثلا ساعات بيبقوا فى منتهى الرخامة بمعنى مثلا جت حالة تلاقى البنات راحوا طالعين ولافين حواليها واحنا كصبيان مفيش مكان وطبعا مش هنتزاحم معاهم طب انتوا كدة كدة هتتخرجوا مش هتشتغلوا فى المجال دة وهدورا على مجال اسهل طب سيبوا فرصة للصبيان اللى هتشتغل فى المجال دة يشوفوا زيكم دة مثل صغير
بالنسبة للقب دكتورة اعتقد ان للاسف ان دة موجود فعلا وان معظم البنات داخلين عشان اللقب دة ودة على فكرة من حق كل واحدة انها تأمن حياتها بالشكل اللى هيا عايزاة خصوصا انها جايبة مجموع كبير فى الثانوية العامة حرام تدخل بية اى كل ية عادية

اقتباس :

ماشى طب ماتقولنا ايه اللى المفروض ندرسه او نشتغله كبنات يعنى؟؟
انهى كلية يعنى بناتى ف وجهة نظرك
عشان مناخدش برأيك
اقصد ناخد برأيك

عند حضرتك كليات كتير جدا تقدر تثقف عقل المرأه والرجل على السواء وترفع من شأنها امام اولادها لما يبقوا فى الجامعه ويناقشوها او امام زوجها لما يتجادلوا فى امر هيبقى نقاش متحضر قائم على الاقناع والاقتناع زى كليات التربية والآداب وكليات الطب البشرى والاسنان لإنى محتاج لما زوجتى تتعب مثلا ألاقى دكتوره تكشف عليها وما أضطرش ألجأ لدكتور .
وبعدين مفيش حاجه اسمها بناتى ومش بناتى يا دكتوره ومش عارف ليه حضرتك شايفه رأييى من منظور معادى انا فى رأيى ده انا فى جانب المرأه تماما .
أما كون حضرتك تاخدى برأييى أو لا مش هيأثر معايا فى حاجه لإن لو حضرتك ماخدتيش برأييى فى غيرك هياخد ولو مفيش حد خالص خد برأييى فأنا يكفينى إنسان واحد بس فى العالم كله إنه يقتنع برأيى يا دكتوره وهو أنا .
وياريت لو حضرتك تورضحيلنا وجهة نظرك فى الموضوع ده علشان نقدر نعرف انتى شايفه الموضوع إزاى ؟

اقتباس :

على فكره مافيش ولد أو بنت داخل الكليه دي حبا فيها كلنا التنسيق هوا اللي جر رجلينا ليها

يا دكتوره كلنا عارفين الكلام ده ومقتنعين بيه لكن المسأله هيا مين اللى هيقدر يقدم للمهنه دى ومين مش هيقدر مش موضوعنا بيحبها أو ما بيحبهاش وطالما مش هيقدر يقدم حاجه يبقى يسيب فرصة التعليم دى لحد تانى يقدر يقدم وما تقولوليش كان ذاكر فى الثانويه علشان ياخد الفرصه لإن كلنا عارفين إن فى ناس دحيحه بتصم الكتاب وهيا مش فاهمه أى حاجه فى أى حاجه ريكوردر يعنى ودول إتحطوا فى كليات غلط بسبب نظام التعليم المصرى الفاشل .

اقتباس :

أنا عن نفسي هقعد ف البيت

مش معنى إنك تقعدى فى البيت يا دكتوره هيا إنك ترمى المجتمع والتعليم ورا ظهرك انتى محتاجه تتعلمى صح علشان تربية الاولاد وتقديمهم كنموذج صالح فى المجتمع مهمه مش ساهله فى مجتمعنا ده ومش هيقدر يقوم بالدور ده أم جاهله طبعا ما أقصدش الجهل بالمعنى العام لإن الواحد ممكن يكون عالم فى مجال لكنه جاهل فى آخر .

اقتباس :

بصراحة انا مش مصدقة ان دة كلام دكتور عنانى كدة هتخلينى اغير فكرتى

ده يا دكتوره يتوقف على إيه كانت فكرتك عنى قبل كده وإيه اللى انتى شوفتيه دلوقتى غير الفكره دى لو كانت فكرة حضرتك عنى إنى شايف إن المرأه تقدر تشتغل فى أى حاجه وتعمل كل حاجه فأرجوكى غيرى الفكره دى لإنها مع إحترامى الشديد مش صحيحه .

اقتباس :

بالنسبة للقب دكتورة اعتقد ان للاسف ان دة موجود فعلا وان معظم البنات داخلين عشان اللقب دة ودة على فكرة من حق كل واحدة انها تأمن حياتها بالشكل اللى هيا عايزاة خصوصا انها جايبة مجموع كبير فى الثانوية العامة حرام تدخل بية اى كل ية عادية

ده لإنك بتفكر تفكير مصرى طحن تفكير من بتاع التنسيق ومجموع الثانوية العامه اللى طول عمرنا بنسمع إنه عمره ما كان معبر عن قدرات الطالب غير قدره واحده بس وهو القدره على الدح المتواصل ليل مع نهار .
أما أنا فشايف إن لو فى أخت دخلت الكليه دى بس علشان لقب دكتوره فدى ماتستاهلش تكون موجوده داخل أسوار كلية طب بيطرى أصلا وتخليها قاعده فى البيت وهنقولها يا دكتوره من غير ما تيجى الكليه وتوجع دماغها ودماغنا .

يا ريت لو فى حد معايا فى رأييى أو مقتنع بيه يقوللى ماتحسسونيش إنى بحارب فى معركه كل اللى فيها عليا ومع ذلك أنا أدها وأدود الحمد لله مش نفخ ولا تكبر لأ ...... ده لإنى مقتنع برأيى جدا وعندى الحمد لله من المعرفه ما يؤهلنى للدفاع عنه وده أفتخر بيه إنى يكون ليا رأى وموقف فى بلد ثلاث أرباعها مسلوبى الإراده وعايشين على ما تفرج .

يا نهار ابيض ى دكتور اية دة كلة انا للاسف كنت واخدة عنك فكرة انك متحامل على البتات بلازمة و منغير لازمة بس غيرتها .حضرتك فهمت غلط و اكيد طبعا مقتنعة جدا ان البنت متقدرش تشتغل ف كل حاجة و دى حاجة مفروغ منها

انا نفسى اتكلم فاسمعوا

فى الاول بحرواى كلفتنا ونسى عشى العروسين دا انا يابنى كلت من البط والحمام يوم دخلة اخوى وده بعده بالك يومها وكمان قبل العرسان ما يتعشوا ومافيش حاجه فى الشقة ينزل يجيب خضار ليه دى عروسة بخيلة على كده وماتستهلش ولا ربع جنيه


اما عنانى ومحاوريه فانا بقول الدنيا دى بسيطة جدا البنت تتعلم لعند الابتدائى او الاعدادى وبعدين تقعد فى البيت ولما تقعد فى البيت مش هيخلها برد وصداع ولا نزلات معوية ويوم ما تيجى تولد الداية ام اسماعيل لسه موجوده ترزق تانى
تتعلم بس عشان تعرف تذاكر للعيال بدل الدروس

تقعدوا فى البيت بقه وبلاش تتعبونى سواء فى السكاشن فى المواصلات فى الشارع حتى فى الشغل بيقولك اللى منزل مرتبات الشغل صاحب العمل بدل ما يجيب ولد ويديه 800 جنيه يجيب بنت ويديها 400 جنيه اما لو تقعد فالشغل هيتوفر والاجور هتغلى وبدل ما نعالج الحالة ب 50 نعالجها بـ100

وغير ده كل اعملوا بالاية
وَقَرْنَ فِي بُيُوتِكُنَّ وَلَا تَبَرَّجْنَ تَبَرُّجَ الْجَاهِلِيَّةِ الْأُولَى الامر لامهات المؤمنين خاصة ولاهلهم عامة

ورأيي زى عنانى يكون لكم تعليم مخصوص بدون اختلاط مع الرجال وتعليم هدداف يطلع بنت تبقى زوجة مربية متعلمة دكتورة اخصائية نفسية الحاجات اللى تحتاجها المرأة المسلمة فى حياتها مش بقى تدرس هندسة سياسة تجارة الحجات اللى تخلى الزوجة سلوكها يتغير



وانا نفسى فى واحده اى تعليم بس تكون متدينة (مالهاش مشاكل مع النقاب) مثقفة خلوقة هادية مش عايزه تشتغل
عايز يكون كل شغلها بس انا وعيالى مش ارجع للبيت ما الاقيهاش اتصل بيها تكنسل وبعد شويه تقلى معلش كنت فى اجتماع مع المدير اقلها فين الاكل تقلى فى التلاجه طلعه وسخنه ليييييييييييه يعنى امال انا مجوز ليه
معلش طولت بس نفسى يكون اسلوب الحوار هادف وما تخدش الحوار على انه تريقه عليك او هجوم عليك
وربنا يرزقنا الزوجة الصالحة (الهادية النادية اللى تريح قلبك ) على رأى ام احد زميلنا
اللهم زوج شباب المسلمين وازقهم العفاف والتقى
وماتنساش يابحرواى العشى امال الواحد بيجوز ليه الا عشان الحمام انا ما بحبش البط

مسيركم تتجوزوا وتقعدوا مراتاتكم ف الببيت وربنا يزود رزقكم بس شغل البيت بيخلى اى زوجة مطحونه طوووووووووووول النهار مش بتقدر تسهر تستنى جوزها ولا تأكله لانه لهو وعياله مش الاتنين مع بعض

انتوا لسه شفتوا حاجه ؟؟؟؟؟؟ خليكم عايشن ف الحلم الوردى

ايه يا جماعه النظرة العنصريه للمراة دى...

لأ ياجماعه طبعا ملينفعش الكلام ال إنتوا بتقولوه دا إيه اللي تعليم لحد ابتدائي وتعليم لحد إعدادي إيهه المانع إنها تتعلم تعليم كويس وبرضه تقعد ف البيت تراعي جوزه وأولادها والبنت برضه لازم تتعلم تعليم كويس علشان يوم لما ترتبط ترتبط برضه بإنسان كويس ومثقف يعني الدكاتره الرجاله ال عماله تتكلم وتقول بتزاحمونا وماعرفشي إيه يوم لما تيجي والدتك تخطبلك وتقولك دا في فلانه أدب إيه وأخلاق إيه دا ملاك ماشي ع الأرض ومعاها دبلوم وفي فلانه التانيه برضه أدب إيه وأخلاق إيه وتدين إيه ومعاها تربيه أوتجاره أو طب بيطري بالأمانه هتختاروا مين وهيكون ردكم علشان يبقى مستوى تفكيرنا متقارب
طيب لما انتوا كارهين وجودنا هتلاقوهم منين
أنا مثلا خطيبي بيشتغل ف المجال الطبي وبيتكلم معايا عن شغله وببقى فاهمه جدا كلامه ومتواصله معاه وأحيان كتير بياخد رأيي ف حاجات وبقدر أفيده والأكتر من كدا كمان أحيان كتيره لما بيتزنق ف الشغل بيجبهولي أكمله ومتفقين بعد الجواز إن شاء الله أقعد أكمله شغله ويديني مرتب بدل سكرتيره يعني
تفتكروا لو أنا مش متعلمه التعليم دا كنت قدرت أفيده وبرضه متفقين إني هقعد ف البيت
وبرضه معايا شهاده يوم لما الدنيا تخنقنا أقدر ساعتها أشتغل وأفيده وهوا كمان ماعندوش مانع إني أكمل دراسه بعد الكليه لو أنا حابه ولو خايفين ع الشغل إحنا سيبنالكم مجال الفيلد وهوا دلوقتي بقى أكتر مجال بيجيب دخل وقبل ماتقولولنا الكلام دا ابقوا غيروا تفكيركم وتفكير مجتمع بحاله وساعتها إحنا ماعندناش إعتراض نرجع لعصر ماقبل قاسم أمين وساعتها برضه مش هيعجبكم لأن الرجاله كدا لا يعجبهم العجب ولا الصيام ف رجب
أنا آسفه للإطاله

انتو لية باصين للموضوع كانة حرب مسيركم تكبروا و تشوفوا الموضوع بعين تانية دة بعد طبعا م تتقدم لبنت الحلال المناسبة ليك و ساعتها بتختار الدماخ للى تناسبك و اكيد الشكل طبعا و متقوليش الشهادة مش مهمة خلينا واقعيين .واحنا كمان هنختار اللى يناسبنا فى التفكير و فى كل حاجة و طبعاااا حاجات تانية فاضية تهمنا كبنات .موضوع الشغل دة بيكون اتفاق سابق بين الطرفين .مش حاسين ان الموضوع اتقلب جواز و خطوبة .مكنش راى بياخدة دكتور محمود بس انتو اللى فتحتوها على نفسكم اللى بيجادل البنات مش هيخلص ى ساتر معلش طولت عليكم

ياجماعة الموضوع خد اكتر من حجمة رأيى باختصار ان اى مخلوق خلقة ربنا سواء كان ذكر او انثى لية الحق انة يدرس اللى هو عايزة ويشتغل اللى هوا عايزة طالما فى نطاق الادب والاحترام اما مسالة عمل المراة انا شايف ان العملية نسبية وكل واحد لية راية يعنى المفروض يحصل اتفاق بين الطرفين على دة وانا شايف ان الشغل بتاع البنت عادى يعنى مش شايف ان فى حاجة تمنعها طالما مش هيشغلها عن بيتها واسرتها
بالنسبة لدخول البنات بيطرى فانا قولت ان دة من حقهم لان كل واحدة عايزة تشوف او ترسم لنفسها حياة كريمة وشايفة ان دخولها بيطرى هيأمن مستقبلها ودة حقها المهم زى ماقولت عشان خاطرى بلاش ترخموا على الولاد فى العملى بالذات
طبعا اللى بيجادل البنات مابيخلصش والدليل اختى نفسى مرة اكلمها فى موضوع واقنعها فية لازم على طول هيا الصح والباقى غلط ياسااتر يارب
اسف على الاطاااااااالة

هههههههههههههه
الله يسامحك يابحراوى دايما تحط الناس فى مشاكل كده وتخلع
ياجماعه احنا بناقش موضوع وانتو بتتخانقو مابتتناقشوش
المساله ومافيها ان كل واحد ليه وجهة نظر
طبعا انا مع ان المراه تدخل الكليه اللى هى عايزاها لكن بصراحه شغل المراه بالنسبه ليا انا ومش لحد تانى ماحبوش لحاجه واحده فقط
انا بشتغل عايز ارجع الاقى واحده مستنيانى ف البيت تشيل تعبى تجهزلى اكلى تغسل هدومى تظبط حياتى مش انا اللى استناها ف البيت وترجع تعبانه م الشغل وارجع انا كمان تعبان ونطلب دليفرى بقا وشغالين كل يوم دليفرى على اساس ان انا مدير بنك بقا
وبعدين لما تشتغل مين يذاكر للعيال
بصراحه من وجهة نظرى الشخصيه ودى حياتى انا زوجتى طبعا هتبقا مؤهل عالى لكن مايهمنيش دكتورة ولا لا لكن هيبقا شرطى ليها ماتقليش اشتغل
انا اشتغل واتعب وارجع البيت الاقى فى قمر بيضحكلى ف البيت مستنينى هى دى الحياة

انا راي ان النقاش بهدوء حيكون افضل ومن غير استخفاف او حدة في الالفاظ ياجدعان
اولا
مافيش نص ديني بيحدد او بيمنع المراة من انها تشتغل اي مهنة شريفة وكمان ما قيش نص ديني بيوضح ان المراة ما تشتغلش الاعمال اللي ممكن نقول عليها احنا انها فوق تكوينها البدني او العقلي او حتى نفسي ولو افتكرنا كويس حنعرف ان اللي كان بيودي الاكل للنبي صلى الله عليه وسلم في غار حراء كانت السيدة خديجة وكان عندها الكثير من الخدم والعبيدوكانت بتعمل دوت وهي حامل كمان كانت بتطلع لغار حراء اللي كان على بعد 3كيلو فو ق جبل النور
وكمان السيدة اسماء رضي الله عنهخا ذات النطاقين كانت بتعمل نقس الكلام وبتكليف من النبي صلى الله عليه وسلم لما كان وهو ورفيقه الصديق في غار ثور في طريقهم للمدينة
ثانيا
لو اتكلمنا على العرف والعادات والتقاليد فانا رايي ديت ديما بتباأى تبع الظروف المعيشية وحالة المجتمع والتاثيرات الخارجية اللي بتغير كتييييير من عاداتنا ةتقاليدنا حتى لو تطلب التغيير دوت وقت كبير او قليل
يعني مثلا في دولة زي السعودية كان من 15 سنة كان ممنوع الكلام في الاختلاط وممنوع ان المراة تسوق العربية
وممنوع التلفزيون والريسيفر ....دلوقتي قنوات كليب سعودية والاختلاط اصبح واقع في بعض الجامعات وباى في كلام ان المراة لازم يكون لها الحق انها تسوق العربية اشمعنا المصريات ونساء العرب الاخريات
في الوقت نفسه كان اول رتل دبابات امريكي دخل بغداد2003 كان من قواده بنت عندها 18 سنة
اسف للاطالة ......... ولكن في النهاية فلتتعلم وتشتغل المراة مااااااااااشاءت

الحمد لله اخيرا لاقينا حد تبعنا

عجبنى رد امال انور اوى

ربنا يوفقك انتى وخطيبك ويزيدكو تفاهم امين يارب