ياريت ياخونا مروحتش لندن ولا باريس قصيدة شكل تانى

حاتجن يا ريت يا اخوانا ماروحتش لندن ولا باريز
دى بلاد تمدين ونضافة وذوق ولطافة وحاجة تغيظ

ملاقيتش جدع متعافى وحافى وماشي يقشر خص
ولا شحط مشمرخ افندى معاه عود خلفه ونازل مص
ولا لب اسمر وسودانى وحمص وانزل يا تقزقيز
حاتجن يا ريت يا اخوانا ماروحتش لندن ولا باريز

ولا عركة فى نص الليل دايرة بالحيل وساحبها بوليس
قدامها جدع متجرجر وشه معور قال يا عريس
الخلق ماهى بتتجوز واشمعنى احنا مفيش تمييز
حاتجن يا ريت يا اخوانا ماروحتش لندن ولا باريز

ولا واحده فى وش الفجر تبرطع ماليه الدنيا صوات
قال ايه جوز خالتى ام احمد سلفة اخوها السيد مات
سبحانك ما اعظم شانك والله الموت دا مفيد ولذيذ
حاتجن يا ريت يا اخوانا ماروحتش لندن ولا باريز

ولا واحد طالع يجرى وواحد تانى بيجرى وراه
ويقول ها هع حصلتك يابن اللى ابصر ايه عاملاه
لا الشارع غيط يا اخوانا ولا احنا بداره ولا احنا معيز
حاتجن يا ريت يا اخوانا ماروحتش لندن ولا باريز

ولا واحد بيبيع حاجة يقول بريال وتاخدها بصاغ
يا اخوانا دى حتى الابرة تاخدها بدوشة وقلب دماغ
حلفان وعراك ومناهده ويمكن ضرب كفوف يا حفيظ
حاتجن يا ريت يا اخوانا ماروحتش لندن ولا باريز

ولافيش ميت الف صعيدى بتوع يانصيب هاجمين ولافيش
ميت الف معوض داعس جاى معاه صندوق ورنيش
والله كرهن القهوة وحرمت اقعد ع الافاريز
حاتجن يا ريت يا اخوانا ماروحتش لندن ولا باريز

ولا شفتش ده اللى بلاسه وده اللى بعمه وده بطربوش
ملابسنا يا ناس تشكيله تعداصحابها ما يتعدوش
دول ناس كنا احسن منهم قول ومسيرنا باذن الله
نبقى احسن منهم برضك بعد الدرس اللى اخدناه
والله ده عيب نتهجى دروس يا اساتذه على التلاميذ
حاتجن يا ريت يا اخوانا ماروحتش لندن ولا باريز

جميلة . بس مصر ماتبقاش مصر من غير التفاصيل دى.

عندك حق فعلا يابوتشي مانبقاش في مصر لو ماحصلش دا كله

دا اللي مخلي لبلدنا طعم ولون مختلف عن باقي دول العالم

يبقى انت اكيد اكيد في مصر

انا بحب الاغنيه دى جدا سواء سيد درويش او ايمان البحر

بس كل ماسمعها مافهمش كل كلماتها اوى لان الموسيقى بتبقى قديمه اوى


تسلم يادوك ع الموضوع روعه

وزكريا احمد تقريبا بيغنيها برضه

روووووووعة بالفعل

تذكرني بروعة البلد التي نحيا بها



قال لندن وباريز


أحنا بلد البرايز أحسن من باريز

ههههههههههههههه
شكرا للجميع على الرد وعلى فكرة انا بعشق مصر وتراب مصر وبعشقها دى شوية
بجد مصر فيها امااااااااكن كتيييييير تحفة بس اغلب الناس مبتعرفش تروحها لاكتر من سبب ومعروفة الاسباب لكن بجد عايز تقييمها لفها كلها

هيا فعلا محتاجه شوية نضافه من العقول الخربانه اللى فيها