الحلقة الثانية من كرسى الاعتراف

ضيفنا فى هذه الحلقة هى العضو lo2lo2a ونتمنى المشاركه اكثر

انـــــــــــــــــــــــا ليه انا عملت لحد حاجه اهئ اهئ اهئ
اسئله بسيطه يا جماعه محدش يسئل اسئله صعبه

بصى يالؤلؤة طبعا انا ماعرفكيش لانى مامعكمش ف بيطرى لكن اسمك اعتقد انه كفايه
وطبعا انا مبسوطه ان بنت هى اللى موجوده فى كرسى الاعتراف علشان اعرف اسال براحتى يلا مستعده
اول سؤال انتى محجبه ولا لا؟
تانى سؤال ايه اكتر حاجه بتفرحى لما تشوفيها واكتر حاجه بتزعلى لما تشوفيها؟
تالت واخر علشان ماطولش ايه اكتر اكله تحبيها واكتر اكله تكرهيها؟
كفايه كده

هههههههههههه مين لؤلؤة اهلا وسهلا ومشرفه كمان صباحنا فل وانا اكتر حاجه بتخنق منهم هما المشرفين المهم انتى وقعتى ولا حدش سمى عليكى نخش ع الاسئله وواحد ضد ميه
اول سؤال انتى كنتى عاوزة تمسكى اشراف ولا ؟
تانى سؤال لو عضو غلس زيى كده غلس عليكى ف موضوع هتعملى ايه؟
ثالثاايه اكتر حاجه تغيظك طبعا علشان اعملها هههه بهزر اصل ترفضونى م المنتدى
رابعا حلمك بعد ماتتخرجى من بيطرى هتشتغلى ايه؟ وده اهم سؤال هو واللى قبله

بسم الله الرحمن الرحيم

اولا ردا على قدوتى برسولى
انا محجبه من ابتدائى الحمد لله
ثانيا انا كتير بفرح وبكون فى قمه سعادتى لما اشوف البحر والاطفال
وازعل لو شوفت حد بينظلم او اشوف عربيه المساجين وانا رايحه الكليه الصبح واهل الناس بيجروا وراها دى بتقتلنى بجد ربنا يفرج كرب كل مسلم

ثالثا انا بحب الاكل جدا ومش بكره ولا نوع فى الاكل الحمد لله

وشكرا لان اسئلتك كانت خفيفه يا قدوتى

ردا بقى على دكتور بيطرى
الاشراف بجد كان مفاجاه بالنسبه ليه لانى مليش فىه ولا اعرف المشرف ده المفروض يعمل ايه
ولا هعمل ليه اى حاجه غير انى ادعى عليه لانه غلس عليه والحمد لله دعائى مستجاب بدليل انى دخلت بيطرى
ثالثا اللى يقدر يرفضك من المنتدى مدير المنتدى او ادارى مش انا واكيد يعنى انت مش هتقول اى حاجه خارجه عن الادب عشان يرفضوك
حلمى بعد ما اخلص كليه اشتغل اى حاجه غير مندوبه مبيعات لانى مش واخده خمس سنين بيطرى وبعد كده الف على الدكاتره ده فى حال لو عنست
واذا صلح الحال فهتجوز وهقعد فى البيت مش ناقصه وجع دماغ

واذا سمحت مش تتريق يا دكتور واسئلتك كانت تقيله جدا

فى حد عايز يسئل تانى نحن فى انتظار ومحدش يزعل منى واسئله خفيفه لو سمحتوا وشكرا لكل من سئلنى وتقبلوى اجاباتى

اهلا جالك الموت ياتارك الصلاه

لا لا انتى عايزه اسئله على رواقه يالوءا

متخافيش مش هتكون محرجه

انتى تعرفى عنى كده

جارى التفكير

احم احم يا مسهل الاحوال يارب بصى ياستى اولا انتى مش شايفة ان غريب ان تتعبى 5 سنين وتطلع عنيكى زى حالتنا كدة وفى الاخر تتجوزى وتقعدى فى البيت ثانياانت اسمك لؤلؤة ياترى لية اخترتى الاسم دة وانتى شايفة ان فى حاجات او صفات مشتركة بينك وبين اللؤلؤة ثالثا ودة الاهم لو رجعت بيكى السنين لورا ياترى هترضى تدخلى الكلية بتاعتنا ولا تفضلى اى كلية تانية حتى لو كانت علوم مثلا

فكرى براحتك يا شوشو ولو اسئله صعبه هيبقى حسابى معاكى فى الكليه وهنشوف انا ولا الاهلى

لا ابدا انا تعبت فى الكليه ومش عايزه اتعب تانى وانا من الناس المؤيدين ان البنت فعلا ملهاش الا بيتها اما اثبت نفسى فى الشغل لاء حاجه متعبه كفايه انى اثبت نفسى فى الدراسه
اسم لؤاؤه جدى الله يرحمه دايما كان بيقولى كده واهلى كلهم بينادونى بيه اما الصفات اللؤلؤ معرفش

هدخل بيطرى برده لانها بجد اجمل كليه وسبحان الله ربنا عالم انى فعلا لاقيت نفسى فى الكليه

أهلا ياقمر منوره الموضوع
انا هسألك شوية اسئله بس يارب تعجبك

امتى احترمتى نفسك اوى؟
امتى حسيتى بالظلم من كل اللى حواليكى؟وعملتى ايه ساعتها؟
امتى حسيتى انك المرأه الحديده السطور وكده ههههههههه لاطبعا بهزر بس قصدى امتى حسيتى بالقوه اللى جواكى؟
لو اديناكى حق انك تقولى على نفسك لقب معين ايه هو ؟وليه اللقب ده؟

مممممممممممممم
كفايه كده لتضربينى

امتى احترمتى نفسك اوى؟
لما لاقيت اللى حواليه بيحترمونى
امتى حسيتى بالظلم من كل اللى حواليكى؟وعملتى ايه ساعتها؟
معتقدش ان حد ظلمنى فى حياتى
امتى حسيتى انك المرأه الحديده السطور؟
لما شيلت المسئوليه وبقيت مسئوله عن البيت لما امى تعبت
لو اديناكى حق انك تقولى على نفسك لقب معين ايه هو ؟وليه اللقب ده؟

لؤلؤه
وليه
عشان حبى وقلبى وروحى جدى الله يرحمه كان بينادينى بيه وحسسنى انى لؤلؤته فعلا وكان شايلنى فى عيونه

اسألكم الفاتحه على روحه وعلى روح امه المسلمين

مشكوره بريق

احم احم احنا هتا -=هنا الادارة=- انا ماليش اسئلة انا ليا تعقيب بسيط على آخر رد
اسألكم الفاتحه على روحه وعلى روح امه المسلمين
الصح: اسألكم الدعاء له بالرحمة والمغفرة ولسائر اموات المسلمين. آمين يا رب العالمين. لانه وبدون تفصيل لا يستفيد الميت من قراءة القرآن من الحى وانما يستفبيد بالثلاثة التى فى الحديث.

اللهم اغفر للمسلمين والمسلمات والمؤمنين والمؤمنات الاحياء منهم والاموات

وبعدين يا حظك يا لؤلؤة شفتى جدك انا ماشوفتش ولا واحد من الاربعة. الحمد لله على كل حال.

عشان ما طولش انا حبيت اقول لدكتور بيطرى ان الادارة بتعرف تغلس وحيكون فيه دورات للتغليس للمشرفين زى لؤلؤة بس لما نفضا ان شاء الله.

ارجو التزام بعرف الادب فى الموضوع ده خصوصا انه مدعاه للاسئله المحرجه