طبعا بعد اللى حصل إمبارح فى العاشره مساء مع الشاب المحترم وائل غنيم - العميل سابقا - ومش بتكلم على بكاؤه - حتى وإن كان عظيم - لإن أنا قلت قبل كده إن لازم نحكم العقل قبل المشاعر.
لكن لو نظرنا إلى الحوار القصير اللى دار فى الحلقه غير المكتمله هنعرف إن فى مؤامره فعلا على بلدنا بس ياترى المؤامره المره دى جايه منين .
مين صاحب المصلحه فى تشويه صورة الشباب العظيم اللى ضحى بحياته ووقته وشغله وقاعد فى ميدان التحريروبيطالب بالرحيل ؟ مين صاحب المصلحه ؟
مين صاحب المصلحه فى إختراع أكذوبة البنت اللى تلقت تدريبات فى الموساد الإسرائيلى وأمريكا مع شباب الإخوان لقلب نظام الحكم فى مصر وتهديد إستقرارها ؟ مين صاحب المصلحه ؟
ولو لسا مش مصدق إنها كانت تمثيليه مغفله من بنت مغفله من نظام مغفل أدخل على الرابط ده وإقرأ الخبر ده
[ندعوك للتسجيل في المنتدى أو التعريف بنفسك لمعاينة هذا الرابط]مين صاحب المصلحه فى ترويج إشاعة عمالة آدمن صفحة كلنا خالد سعيد اللى شفناه إمبارح وعرفنا هوا مين ؟ مين صاحب المصلحه ؟
مين صاحب المصلحه فى تسفيه وتبعيض مطالب الشباب فى التحرير اللى هما كل شباب مصر وفى كل محافظه بتخرج الجموع تأيدهم والزقازيق شاهده وكل يوم فى الشارع ؟ مين صاحب المصلحه ؟
ياترى مين صاحب المصلحه فى بقاء الرئيس محمد حسنى مبارك فى السلطه حتى نوفمبر ؟ الشعب والبلد ولا الرئيس نفسه ؟ مين صاحب المصلحه ؟
لو فعلا دخلت علينا حكاية إنه عايز يظل فى السلطة محافظا على استقرار البلاد طيب ليه ماخافش على استقرار البلاد طول فترة حكمه وهوا مالهوش نائب وكل يومين كان بيخش فى غيبوبه طيبمافكرش إنه لو صبح مات البلاد هتولع لإنه مفيش نائب يمسك البلد ؟ بيتهيألى ماكانش يهمه الموضوع ده فى حاجه .
طيب بعد ما بقى فيه نائب نخاف إحنا من الفوضى ؟
هل صدقنا فعلا قول الرئيس السخيف - أقصد القول وليس الرئيس - لم أكن أنتوى الترشح لفتره رئاسيه قادمه ؟ لو صدقت أنا عندى فيديو بيجمع مبارك ونظيف وهما بينقشو مشروع فى النقل ومبارك بيقولهم باللفظ لو عايزين أى بند قولو دلوقتى لإن بعد 2012 مفيش أى بند جديد .
هوا ده اللى لم يكن ينتوى الترشح وللأسف مش بعرف أضيف فيديو فى الصفحه ولو بعرف كنت حطيته علشان تتفرجوا عليه كلكلم . ده واحد من كتر ما قعد ع الكرسى ظن أنه سيخلد فيه إلى أبد الآبدين .
ياريت فعلا نصحى ونفوق ونعرف مين اللى معانا ومين اللى ضدنا ونحاول نشغل دماغنا فعلا ونسأل نفسنا الريس ليه مصمم على البقاء حتى نوفمبر والنائب بتاعه بيأكد على كده ورئيس الوزراء كمان ؟
ياريت نعمل فعلا زى ما الدكتور مصطفى محمود بيقول
" بات ضروريا أن يقيم كل منا أكشاك الحراسة على كل مداخل حواسه ويحول عقله من قارئ إلى ناقد .بات ضروريا ألا نستمع إلى أى شئ فى استسلام وحسن نيه بل نصغى إليه فى شك وارتياب وتحسب "
يارب نكون فهمنا حاجه من التجربه الأخيره دى ونشغل مخنا شويه وكفايه الثقه المبالغ فيها أوى دى لنظام عاش طول عمره فاسد مش هيصلح تاريخه شوية شهور يقضيهم كويس فى آخر الخدمه .
قضى الله سبحانه وتعالى على عباده أنه من عاش على شئ مات عليه .
ونظام مبارك زى ماعاش على الفساد هيموت برده على الفساد .................................
موضوع: لكل واحد عاش الفتره اللى فاتت مش فاهم أى حاجه فى أى حاجه وفاكر نفسه فاهم كل حاجه يارب تكون فهمت حاجه . 
الثلاثاء 8 فبراير 2011 - 10:09
