عصابات البربر تدخل ميدان التحرير على ظهور الإبل والخيل وتصب من قنابل المولوتوف على المعتصمن ..... كتر خيرك يا ريس

بالطبع لا يخفى على أحد ما شب بالأمس فى ميدان التحرير من محاولة تصفية الإحتجاجات والإعتصام الذى بدأه شباب 25 يناير الحر منذ يوم الجمعه حاملين رسالة واضحه وصريحه للرئيس مبارك مفادها كفاك حكما وظلما إرحل وكن كريما .
بعد الخطاب العاطفى الرومانسى الذى ألقاه الرئيس مبارك أول أمس على شاشة التليفزيون المصرى والذى دمعت له عيون المصريين ورقت له قلوبهم ورأوا فى الرئيس مبارك ذلك الرجل العظيم الذى يأبى أن يترك البلاد فى محنتها ويتخلى عن السلطه بل أصر على أنه لن يترك البلاد حتى تتجاوز أزمتها ومحنتها وربما لم يدرك أنه هو نفسه موضع أزمتها وسبب محنتها .
أختلفت الآراء والمواقف بين مؤيد للرئيس مبارك ومعارض له ولبقائه على رأس السلطه وربما أقرب ما يتبادر إلى لسان المؤيدين لبقائه هو قولهم " هتفرق إيه لما يستنى أو يمشى دلوقتى ماهو كده كده ماشى " ولكن لمعارضى بقاءه قول آخر وهو كفى ما مضى ويوم كسنه لن ننتظر يوما آخر مضى ثلاثون عاما ولن يكون هناك المزيد ولكل فريق ما يؤيد به رأيه .
الرئيس المصرى محمد حسنى مبارك فى خطابه الأول أقال حكومة الدكتور أحمد نظيف وعين نائبا له وهو اللواء عمر سليمان رئيس جهاز المخابرات ووضع على رأس الحكومة رجلا من أقرب المقربين له وهو الفريق أحمد شفيق وزير الطيران المدنى فى الحكومة المقاله ونائب الرئيس مبارك سابقا حينما كان على رأس السلاح الجوى حتى حرب أكتوبر وما بعدها أى أننا أمام حكومة يمكن أن تسميها عائلة الرئيس مبارك العسكريه .
ثم أتى الخطاب الثانى يحمل مزيدا من القرارات التى رأى فيها البعض رصاصة الخلاص من التظاهرات والإحتجاجات والإعتصام القائم فى ميدان التحرير ولكن كان للمعتصمين فى ميدان التحرير رأى آخر وكلمة وصفت بكلمة العملاء ومخربى الوطن . رأى هؤلاء الشباب أن الرئيس المصرى لم يحقق أيا من مطالبهم فى خطابين كانا أقرب إلى الدراما والتيراجيديا من صوت العقل والحكمه والخطاب السياسى الجاد .
فما كان من تشكيل حكومة جديده إلا محاولة لتقريب المؤسسة العسكريه من نظام الحكم كدعم قوى وصلب يقوى شوكة الرئيس مبارك بعد أنهكها هروب رموز الحزب الوطنى وغضب الشعب عليهم. كما حمل تعيين نائب للرئيس رسالة طمئنة للغرب الذى هاجم وبكل عنف موقف الرئيس مبارك وشرطته من المتظاهرين وما حدث فى الأيام الأولى والتى تلتها من الإحتجاجات فكان تعيين عمر سليمان رسالة سخيفة لم تغير شيئا من الواقع ولم تطرح فكرة تدفع المعتصمين لفض الإعتصام والعوده إلى بيوتاتهم .
أما عن حديث الرئيس عن ملاحقة المسئولين عن حالة الإنفلات الأمنى التى حدثت فى البلاد فور غياب عناصر الشرطه فظنها البعض حديثا عن وزير الداخلية الأسبق حبيب العادلى وقياداته ولكنها لذهن المتظاهرين كانت أقرب إلى خطاب تحذير ولهجة إنذار بأنكم ستلاحقون وتنالون أشد العقاب لما تسببتم به من فوضى أمنيه وخراب فى البلاد وقد بدأت خطوات هذه الملاحقه حينما وجه النائب العام المصرى قبل يوم الجمعه تهمة قلب نظام الحكم لحوالى 20 من المتظاهرين البارزين وما خفى كان أعظم .
تحدث الرئيس عن تعديلات دستوريه فى المادتين 76 و77 من الدستور لتخفيف القيود على ترشح المواطنين لمنصب رئيس الجمهوريه حتى يشمل الترشيح قاعده أوسع بعد أن كان قاصرا بفضل هلتين المادتين من الدستور على أشخاص بعينهم ولكنه ربما لم يع أن الدستور المصرى أعور فى عدة أوجه غير هذين الوجهين والمعتصمون فى ميدان التحرير يرون أنهم يستحقون دستورا أفضل من دستور الثورة هذا والمعهود تسميته بدستور عبد الناصر .
أما عن النظر فى الطعون على الإنتخابات البرلمانيه الأخيره لمجلس الشعب فربما أدرك الرئيس أنه ونظامه كانا فى معزل عن أحكام القضاء وكانت غشاوة العناد والكبر تغمى على أنظارهم ولكن حمدا لله أن أعينهم تفتحت أخيرا وعلمت أن هناك 3000 حكم قضائى صدر عن مختلف المحاكم ومنها الإداريه العليا على 500 مقعد فى مجلس الشعب - بالزمه مش مهزله - ولكن حتى هذا النظر على الطعون ليس كاف بالنسبة للمتظاهرين وإنما يرون أن حل مجلسى الشعب والشورى فيه الشفاء لبعض جراحهم السياسيه وربما تكون إنتخابات نزيهه تمرينا لإنتخابات الرئاسة القادمه التى سيكفل نزاهتها دستور جديد .

أنا حاولت أحلل بعض الأحداث متضمنا رأييى الشخصى ياريت نرى نقاش سياسى متعقل وكل واحد عنده فكره أو سؤال يحب يطرحه يتفضل علشان أطرح أسئلتى على الناس أنا كمان وأكيد كلنا عايزين الخير لمصر.

انا عايزه اسالك انتى لسه عايز البرادعى

اقتباس :

أولا ياعناني شباب 25 يناير ماكانوش بيطلبوا برحيل حسني

أول مره أسمع الموضوع ده اللى عرفته من الفضائيات ومن زمايلى اللى كانوا فى التحرير ومن المظاهرات اللى خرجت فيها إن الكل كان عايز رحيل حسنى ياترى جبتى المعلومات دى منين يا انفنتيود ؟

اقتباس :

كفايانا بقي خراب ياعناني عايزين شويه استقرار وامان بقي

أكيد طبعا كفايانا خراب ولما ينتهى التحقيق اللى وعد بيه رئيس الوزراء هنصل للمتسبب فى كل أحداث الشغب والعنف والفراغ الأمنى اللى حصل ده والموضوع بات شبه واضح بعد وضع حبيب العادلى وآخرون تحت الإقامه الجبريه وجارى البحث عن رجال الأعمال التى دفعت ثروات لبعض الناس للتخريب والشغب وحتى القتل .
الناس اللى فى التحرير واللى بتخرحج تتظاهر مالهاش علاقه بالكلام ده وقضيتهم عادله ومطالبهم مشروعه وبيتهيألى ده وصف الرئيس ونائبه وأحمد شفيق ولا أنا ما خدتش بالى من الخطاب .الناس دى مش مسؤله عن التخريب اللى حصل علشان نقول إن إعتصامهم هو الدافع للتخريب .

اقتباس :

انا عايزه اسالك انتى لسه عايز البرادعى

أنا بقى نفسى أفهم إيه اللى حصل مع البراعى علشان الموقف المعادى اللى حاصل معاه ده
أنا فعلا تبين لى فى الأحداث الأخيره أنه هناك من هو أفضل من البرادعى لقيادة دفة البلاد ولكن فى التظاهرات المؤيده للرئيس شايلين يافطات عليها البرادعى خاين وعميل ومأجور الكلام ده مصدره إيه ولا هيا بقت لبانه فى بق أى واحد مش عاجبه حد يقولوا عليه خاين وعميل .
ياريت يا دكتوره قمر الزمان تشرحيلى إيه وجهة نظر حضرتك فى الدكتور البرادعى واللى تخلينى أرى فيه إنه لا يستحق قيادة البلاد زى غيره ؟

مش معنى انها اتصلت بيه انه عميل ليها ودولتها ........ رئيسنا كان له اتصالات مباشره مع الولايات المتحده الامريكيه وفيه وثائق بينهم ماحدش يعرف عنها حاجه واللى ممكن تكشف لنا مدى تعاون الرئيس معاهم واتمنى ويكيليكس تفصح عنها قريبا
البرادعى بوصفه شخصيه لها ثقلها فى مصر وفى العالم بحكم موقعه السابق كرئيس للهيئه الدوليه للطاقه الذريه يستحق ان يجرى معه حوار عن كيفية حل الازمه وتفكيك الوضع الراهن
وبيتهيألى الرئيس بتاعنا القدوة هوا اللى ركبهم علينا وخلاهم بيتبجحوا دلوقتى وهما بيطالبوه بالرحيل الفورى ماهو لو كان صاحب نظام قوى وكلمه مستقله مش تابع وبس كان زمانهم بيفاوضوه من تحت الترابيزه وماحدش واخد باله مش يطلعوا فى وسائل الاعلام وعلى عينك يا تاجر ويقولو له يلا بره وكمان دول اوروبا ماهو خلانا ملطشه من الاول .
أما بالنسبه لشباب 25 يناير فكان مطلبهم الاول من جملة المطالب رحيل النظام المصرى الفاسد بكل رموزه وعلى رأسهم الرئيس صاحب الاختيارات العقيمه على مدار 30 عاما وده واضح فى البيان اللى صدر عنهم فى بداية التظاهرات .

أكيد ويارب ينجينا من الأمر على خير ونطلع بأقل الخسائر

انتم ناسيين ان دكتور البرادعى هو اللى دخل امريكا العراق على اساس ان فيها نووى لما كان رئيس الهيئة هو مينفعش يبقى رئيس غير ليها و اصلا امريكا مش محتاجة سبب .وبعدين اية حكاية عميل او جاسوس دى اللى بيقولوها علية و على الريس يعنى هو احنا لسة عارفين الكلام دة دلوقتى لو فعلا.... نبقى مغفلين و دى نقطة تتحسب لية ولا احنا نقدر نقف ادامهم و كل اللى عايزينة رئيس دبلوماسى زى مبارك يعرف يحمينا من الدول اللى برة مع اصلاح داخلى فى كل النواحى بقى لاننا محتاجين اصلاح جزرى و عايزيين حد يبقى معانا بجد مش بيننا و بينة مليون واحد بيقولوا اللى عايزينة و ينهبوها فى الاخر و لو بصينا لتاريخ مصر كل اللى حكموها عسكريين يعنى ناس فاهمة سياسة مش اى حد يتكلم كلمتين نقول دة سياسى و لحد منوصل للوقت دة ربنا يعدينا لية بخير

البرادعى لا يمكن لا يمكن لا يمكن يمسك حكم مـــــــــــــصـــــــــــــــر

معلش يا دكتور عنانى لسه شايفه ردك لان مش كان فى نت عموما انا لما سالتك كنت حابه اعرف ايه سر اقتناعك اللى كان شديد بيه لان دلوقتى اعتقد انك ملاحظ انه عايز يطلع ع حساب الشباب عاش معانا كام سنه ده عشان يحكمنا وزى ماقالوا واحد ماحاولش يمنع امريكا من دخول العراق ازاى نستامنه ع بلدنا

معلش يا دكتور عنانى لسه شايفه ردك لان مش كان فى نت عموما انا لما سالتك كنت حابه اعرف ايه سر اقتناعك اللى كان شديد بيه لان دلوقتى اعتقد انك ملاحظ انه عايز يطلع ع حساب الشباب عاش معانا كام سنه ده عشان يحكمنا وزى ماقالوا واحد ماحاولش يمنع امريكا من دخول العراق ازاى نستامنه ع بلدنا

اقتباس :

انتم ناسيين ان دكتور البرادعى هو اللى دخل امريكا العراق على اساس ان فيها نووى لما كان رئيس الهيئة هو مينفعش يبقى رئيس غير ليها و اصلا امريكا مش محتاجة سبب

أنا ليا تعقيم بسيط ع النقطه دى لإنى سمعتها ألف مره وشرحتها للناس ألف مره
أولا البرادعى كان رئيس الهيئه الدوليه للطاقه الذريه أتفق معاكم لكن عارفين البرادعى خريج إيه ؟
البرادعى خريج حقوق ...................... ومنصبه فى الوكالة الدوليه كان منصب إدارى لتسيير الأعمال لكن مش بتاع ذره وما يعرفش الذره شكلها إيه .
فى أعمال التفتيش اللى تمت فى العراق كانت التقرير بترفع ليه من علماء الذره اللى فتشوا على المنشآت النوويه العراقيه وهما اللى كتبوا فى تقاريرهم العثور على بعض ذرات اليورانيوم النشط فى هذه المشآت دليل على نشاط نووى .
أظن البرادعى مش هيقولهم لأ مش مصدقكم ورونى الذرات دى هيردوا عليه ويقولوله .... أنت بتاع ذره ؟
فكان بيصدق على التقارير كرئيس للوكاله ويرفعها للأمم المتحده .
لكن اللى أقدر أفسره هو كثرة حملات التفتيش اللى راحت العراق ما كان ممكن من أول لجنة تفتيشش - لو هوا عميل وعايز يدخلهم العراق - يرفع التقرير إلى الأمم المتحده ويقولهم فى نووى ابعتوا جيوشكم لكن ليه ما نقولش إن البرادعى كان بيعدد لجان التفتيش لعل تقارير بعض اللجان تكذب تقارير لجان أخرى وتنفى وجود سلاح نووى وتنجوا العراق من محاولة الغزو ؟...................... مش ممكن برده ؟
زى ما بنفترض سوء الظن الغير قائم على حقائق منطقيه ممكن نفترض حسن الظن وخصوصا لو كان المنطق يدعمه .

أما بالنسبه للرئيس السياسى اللى الدكتوره وايت شادو بتتكلم عليه ..................
حسنى سياسى ؟..................
على كده العبد اللى كان موجود على أيام الجاهليه كان أعظم سياسى فى العالم بما أنه لم يكن يناقش أمر سيده وينفذ جميع الأوامر المسندة إليه وبالتالى كان على وفاق دائما مع سيده ومفيش بينهم مشاكل .......... فلما يقعد العبد ده مع عبيد تانيين وكل واحد يحكى هوا اتجلد كام جلده بسبب أمر لسيده لم ينفذه ........ يقوم يرد عليهم العبد بتاعنا ويقولهم بس انا عمرى ما انضربت ولا جلده ............... يقولوله لا ده انت كده سياسى جامد آخر حاجه .
فهمتينى يا دكتوره ؟
التبعيه والاستجابه المطلقه للأوامر اللى جايه من أمريكا مش معناها سياسه دى معناها خضوع وعبوديه
وأنا كمصرى حر أفضل إنى أعيش فى حرب طول عمرى وأنا أمتلك كرامتى وقرارى فى إيدى ( زى ما بتعمل إسرائيل ) على إنى أعيش عبد ذليل تابع وأعيش فى أمان وسلام .
والدليل على التبعيه والخنوع اللى كان بيقدمه النظام المصرى ومبارك هوا الطريقه المتبجحه اللى بتتكلم بيها أمريكا وبتفرض على مبارك وتقوله تنقل السلطه دلوقتى ............... إحنا استغربنا من الطريقه دى واستنكرناها لإننا أول مره نشوفها على الشاشه وعلى عينك يا تاجر لكن للأسف هيا دى الطريقه اللى كانت بتكلم بيها أمريكا حسنى قبل كده بس فى الإجتماعات المغلقه بعيد عن عينينا .................. اعمل وسوى وشيل وحط والبيه علشان خايف على عرشه - مش على مصر طبعا - كان بينفذ زى الـ ....................
مش عارف أقول إيه بس أنا كمصرى ليا تاريخ زى اللى ليا أستحق حياه أكرم من اللى أداهالى حسنى ونظام أقوى فى وش الغرب وأمريكا مش فى وشى .
لما كنت تسأل الست تقولها إيه أكتر حاجه تحبيها فى جوزك تقولك ................ إنه يبقى أسد بره البيت وجوه البيت حنين ولطيف وده عكس اللى كان بيعمله حسنى ونظامه ..... مع الأمريكان قطه ومع المصريين فى الداخل وحش وغول على رأى بيت الشعر
أسد على وفى الحروب نعامة ........... فتخاء تفر من صفير الصافر
والشاعر المصرى محمد جوده كان بيقول بيوصف النظام المصرى فبيقول
لابس لاعداءنا قميص النوم وعلينا الشنبات العيره
طولت عليكم بس حبيت تعرفوا وجهة نظرى كاملة

كدة كدة كلام البرادعى فى موضوع زى دة حبر على ورق و مش فارق معاهم اصلا امال اية الجزمة اللى لسة معلمة على خلقة بوش لحد دلوقتى انا لما قولت اللى حكموا مصر عسكريين كان قصدى العظماء بتوع زمان مع اننا مشوفناهمش بس واحد زى الرئيس الراحل السادات عايشين فى سلام هو صنعة لينا من سنين و عايشين نحكى بحرب جاب لينا كرامتنا بيها من زمان.ِ , و الرئيس الراحل جمال عبد الناصر دى الناس اللى تعبت عشان مصر مش اللى خدها على الجاهز و الريس بتاع دلوقتى على قد ما سمعت انة كان عندنا فى الكلية الجوية ومعنى الكلام انة كان ف الطيران ايام الحرب و كان نائب الريس يعنى عارف الامور ماشية ازاى مش جاى من برة و لسة هيتعلم الف بة .اما بقى لو الامور خدت شكل تانى مع الدول الكبيرة مش هنلحق حتى ندافع عن نفستا اصل ساعتها مش هيكون فى برادعى يقولهم لا او اة و رحم اللة امرىء عرف قدر نفسة و ربنا يسترها علينا معلش طولت عليك يا دكتور محمد بس لو فى عندى معلومات غلط يا ريت تبقى تقول اصلى مليش ف السياسة