القصه الحقيقيه لروميو وجولييت
طول عمرنا قاعدين نقول ان روميو وجولييت
مثال للحب والرومانسية
بس انا لما قريت قصتهم لقيت الموضوع غير كدة خالص ....
انا مش عايز انم على حد بس غصب عنى لازم احكيلكم الحقيقة
بصوا بقى......
روميو دة كان واد حبيب كان لسة طالع من قصة حب اصل البت اللى
كان بيحبها قبل جولييت والله اعلم كانت منفضاله:.....
صاحبه لما شافه متضايق قاله تعالى وانا اوديك حفلة
وهيكون فيها بنات كتيييييير ....
طبعا روميو ماصدق ووافق على طول
اول ماروميو شاف جولييت
قلبه بقى عامل زى سارينة الاسعاف
(تقريبا البت جولييت دى كانت جامدة)
روميو طبعا عاكسها وقالها (الحلو لما يتدلع يخللى الرصيف يولع)
وهية طبعا تقلت وبصت له من فوق لتحت وقالتله (ياسم)
روميو مافقدش الأمل وقالها زى ما سمع فى ميلودى
(لازم مامى كانت نحلة علشان تخلف العسل دة كله)
جوليت طبعا ضحكت الضحكة اللى كلنا عارفنها ...
تقريبا كدة عجبوها الكلمتين دول
المهم ...اتقابلو بعد الحفلة واتفقوا على الجواز وطبعا اييييه؟؟؟؟.>>>>
(فى السر)بس على يد كاهن...مش عرفى علشان بس مانظلمش حد
واخدين بالكم معايا
ال ايه السبب ان عائلاتهم كانو متخانقين مع بعض .......
المهم...راحوا الاتنين للكاهن واتجوزوا ....
ولسوء الحظ فى اليوم اللى بعده حصلت خناقة جامدة بين شباب العيلتين
روميو كان واقف وحاول يهدى الوضع بس ما نفعش
ولقى واحد من عيلته اتقتل ...
روميو بقى الشهامة اخدته وقال بما انها بايظة بايظة انا هاقتل واحد من عندهم
اشمعنى همة يعنى؟؟؟!!!!!!!!
واتحكم على روميو انه يتنفى برة البلاد.....
اول ما جولييت عرفت طبعا (لطمت)وفضلت تقول
( يابختك المايل ياجولييت،ياحظك الاسود ، ده انا لسة متجوزاه امبارح)...
وقعدت تندب حظها شويتين
...ومرت الايام و جه واد كدة اخر تمام حاجة كدة عشرة على عشرة
( ابن ناس ومحترم ومؤدب ومنتظم فى الصلاة ووسيم ومش بيدخن و..و...و... و...)
كان اسمه (باريس) وكان عايز يخطب جولييت ....
هنا بقى كانت الورطة الكبيرة
لانها ماينفعش تتجوز باريس علشان هية على ذمة روميو دلوقتى
جوليت لجأت للكاهن اللى تمم جوازتها هية وروميو واتفقوا على خطة
... وفى نفس الوقت
يبعتوا مرسال لروميو يبلغوه الخطة وهية انها تشرب دواء
والدواء دة هيخليها كانها ميتة
والكل هيتخيل انها ماتت ويدفنوها وبعد كدة يروحلها الكاهن يخلصها
من التابوت اللى هتدفن فيه ويوديها لروميو وتهرب معاه..........
(هوة دة الاخلاص فعلا تهرب من اهلها علشان تروح لواحد متجوزاه فى السر)
الله عليكى ياجولييت.......... بنت ناس بصحيح
وفعلا نفذوا الخطة وتشاء الاقدار ان المرسال مايوصلش لروميو
ويسمع بخبر ان جولييت ماتت وبما انه هوة كمان زهق من حياته فى المنفى
قال اشرب سم انا كمان
المهم راح وقال انا لازم اشوف جولييت واموت جنبها فى نفس القبر
وراح علشان يفتح التابوت مين شافه؟؟؟؟؟؟؟!!!!!
تخيلوا مين؟ باريس........
من ذوقه ورقته كان رايح ينثر زهور على قبر جولييت .......
طبعا لما باريس شاف واحد جاى يفتح قبر جولييت منعه لان دة فعل شنيع
روميو طبعا سبع الليل اتخانق مع باريس وقتله....
ومات الشاب الطيب علشان يدافع عن واحدة ميتة ....
يدوب كان هيخطوبها ...امال لو كان اتجوزها كان هيعملها ايه؟؟؟
الخايبة ضيعته من ايديها
شرب روميو السم بعد ماقتل باريس ومات جنب قبر جولييت
صحيت جولييت لقيت روميو ميت وفى ايده ازازة السم
وقال ايه!!!!!!!!
جولييت لقيت السم على شفايفه قالت تبوسه علشان ييجى السم فى بقها .........
افلام عربى يعنى ..... ماعلينا
وبعد ماباسته شربت باقى السم اللى كان فى الازازة ....
ماكان من الاول ياختى من الازازة على طول
وماتت هية كمان وهية دى الرؤيه المنطقيه لروميو وجولييت
شوفته بقى جولييت لو كانت محترمة ماكانتش تتجوز فى السر
وكان ربنا هيرزقها باحسن من روميو مليووووووووون مرة ( باريس )
يالا ال جت الحزينه تفرح ما لقيتش مطرح ...........
موضوع: القصه الحقيقيه لروميو وجولييت 
الثلاثاء 12 أكتوبر 2010 - 17:36
